La Comisión Sectorial d'Estudiantes del Grupu 9 d'Universidaes alderica en Santander asuntos como l'atención a la diversidá o la EBAU
La Universidá de Cantabria fixo de anfitriona d'esti foru al qu'asistieron responsables de les instituciones del Grupu
La Comisión Sectorial d'Estudiantes del Grupu 9 d'Universidaes (G-9) axuntóse ayeri xueves y güei vienres en Santander pa encetar diversos asuntos d'interés común ente les instituciones que la integren, como'l futuru de la EBAU/EVAU o l'atención a la diversidá del estudiantáu.
Les vicerrectoras y vicerrectores d'Estudiantes de les universidaes públiques del Grupu aconceyaos, so la presidencia del rector de la Universidá de La Rioxa, Juan Carlos Ayala, y cola participación tamién de la Secretaría Xeneral del G-9, intercambiaron idees, opiniones y bones práctiques sobre lo que caúna de les instituciones ta faciendo nos ámbitos de competencia rellacionaos con Estudiantes.
Juan Carlos Ayala señala que "encetemos la tema de cómo tán camudando los estudiantes nes universidaes" y la necesidá de "faer fueyes de ruta y tar preparaos p'ameyorar l'ayuda que los emprestamos". Asina, plantégense retos como l'atención a la discapacidá, l'accesibilidá de los edificios o l'asesoramientu a alumnáu con distintes problemátiques personales.
La captación d'estudiantes y l'orientación ye otru ámbitu d'interés común, según el futuru de les pruebes de la EBAU/EVAU. Nestos momentos de cambéu", los representantes del G-9 comparten esmolición por cómo se va xestionar nos próximos años l'accesu a los campus y la movilidá del alumnáu si dexa d'aplicase'l distritu únicu.
L'alcuentru de Santander cuntó na primer xornada cola presencia como anfitrión del rector de la Universidá de Cantabria (UC), Ángel Palacios. Nes primeres sesiones presentáronse les esperiencies innovadores de la mesma UC nel campu de les relaciones estudiantiles y encetáronse les novedaes que presenta la Llei 3/2022 de Convivencia Universitaria. Otres temes trataes fueron l'accesu y l'almisión, los programes empobinaos a egresados universitarios o la matriculación d'estudiantes estranxeros.
La vicerrectora d'Estudiantes de la Universidá de Cantabria, Marta García Lastra, destacó la importancia d'estes cites pa "l'intercambiu d'esperiencies", que gracies a ser foros amenorgaos puede realizase "de forma fluyida y rápida", añede Juan Carlos Ayala. Con una periodicidad semestral, los asistentes afitaron la see de la próxima xunta, que va ser en septiembre d'anguaño en San Millán de la Cogolla (La Rioxa).
Galería d'imaxes
