Nel branu de 1883, la Institución Llibre d'Enseñanza entamó, con una importante participación del entós ventiañeru Aniceto Sela Sampil, dos escursiones xeográfiques qu'auníen exerciciu físicu y estudiu y inculcaban a los sos participantes "l'amor a la naturaleza al empar que sirvíen para exercitar les sos fuerces con llargues marches a cuerpu", en palabres del propiu Aniceto Sela. Güei, 139 años dempués, la Universidá d'Uviéu entama'l Campamentu Científicu Itinerante (CCI) Sela. Escursión xeográfica pelos Picos d'Europa, 1883-2022, en forma d'unes xornaes de campu que retruquen el percorríu d'estes escursiones del branu de 1883. Esta actividá de formación complementaria, dedicada a Aniceto Sela y entamada por CeCodet y el Serviciu de Deportes, va tener llugar ente'l 4 y el 9 de xunetu, nuna marcha a cuerpu de cuatro xornaes na que se va percorrer d'este a oeste los Picos d'Europa. 

 

El CCI Sela ta dirixíu a estudiantes universitarios, participantes en PUMUO y alumnáu del últimu cursu de bachilleratu, según a les universidaes socies de la d'Uviéu. Ente los oxetivos de l'actividá atopen l'ampliación de les capacidaes de los participantes pa entender el paisaxe por onde colen y el familiarizase cola lóxica del proyectu n'equipu, como preseos útiles pal so desempeñu ciudadano y profesional. Pa ello, va cuntar cola collaboración de los profesionales del Reximientu d'Infantería Príncipe númberu 3.

 

Mientres les xornaes, va realizase una reconocencia territorial a cuerpu, empuestu y reglamentado, empobináu a ampliar la cultura territorial de los participantes y les sos competencies pal trabayu n'equipu. Pa llogralo, van realizase distintos exercicios, simulacros y proyectu por grupos, y va redactase un cuadiernu de campu. Amás, van tener lugar conferencies de profesores invitaos y van faese exercicios d'orientación, llectura de mapes, interpretación del paisaxe y analís territorial.

 

El CCI Sela tien un total de 25 places y la matrícula va tar abierta hasta'l 20 de xunu.  La participación na actividá va ser acreditada a cada participante por aciu un certificáu d'asistencia estendíu pola Fundación de la Universidá Uviéu, amás d'otru nel que van constar les actividaes realizaes y les hores de permanencia nel CCI Sela.