L'Asamblea Xeneral de Crue, axuntada na Biblioteca Nacional, escoyó por unanimidá esti martes 26 d'abril al rector de la Universidá Carlos III de Madrid (UC3M), Juan Romo, como presidente d'esta asociación qu'integra a 76 universidaes. Romu sustitúi al rector de Córdoba, José Carlos Gómez Villamandos, que desempeñó'l cargu dende mayu de 2019.

 

Amás, l'Asamblea Xeneral aprobó la nueva composición del Comité Permanente de Crue, de manera que los dos vicepresidentes van ser la rectora de la Universidá del País Vascu, Eva Ferreira, y el rector de la Universitat Ramon Llull, Josep Maria Garrell, ente que los cuatro vocales van ser la rectora de la Universitat Jaume I, Eva Alcón; la rectora de la Universidá d'Huelva, María Antonia Peña; el rector de la Universitat de Lleida, Jaume Puy, y la rectora de la Universidá CEU San Pablo, Rosa Visiedo. La rectora de la Universidá Autónoma de Madrid, Amaya Mendikoetxea, va ser la nueva delegada de la Presidencia de Crue para Polítiques d'Igualdá.

 

El rector Juan Romo, qu'hasta agora ocupaba'l cargu de vicepresidente de Crue, presentó les principales llínees de trabayu d'esta asociación para avanzar en cuatro direcciones: autonomía universitaria, financiamientu, internacionalización y polítiques de profesoráu. Amás, aportunó en qu'el so trabayu al mandu de Crue va centrar nel sofitu a les universidaes na so misión de xeneración y tresmisión de la conocencia, según la meyora y cohesión de la so redolada social. 

 

El nuevu presidente de Crue, rector de la UC3M dende marzu de 2015, ye llicenciáu en Ciencies Matemátiques con Premiu Estraordinariu na Universidá Complutense de Madrid, Ph.D. in Mathematics en Texas A&M University y estancia postdoctoral en City University of New York. Foi profesor titular na Universidá Complutense de Madrid y na Carlos III, onde anguaño ye Caderalgu d'Estadística. Nesta universidá desempeñó'l cargu de Vicerrector de Tercer Ciclu y Posgráu, y de Profesoráu y Departamentos. Romo foi presidente de la Young European Research Universities Network (YERUN) dende 2015 hasta 2019 y de la Conferencia de Rectores de les Universidaes Públiques Madrilanes (CRUMA) dende xineru de 2018 a avientu 2018. Publicó artículos en revistes internacionales y ye coautor de cuatro llibros. El so trabayu d'investigación actual inclúi aplicaciones en xenética (microarrays y SNPS), datos financieros, big data y analises d'imaxes.