La Universidá de Zaragoza acoyó una xunta de la Comisión Sectorial de Xerencies del Grupu 9 d'Universidaes, presidida de forma telemática pol rector de la Universidá d'Uviéu. Nel alcuentru, que tuvo llugar el 7 y 8 d'abril, encetáronse, ente otres cuestiones, el procedimientu de estabilización pal amenorgamientu de la temporalidá nel empléu públicu, l'aplicación de la reforma llaboral nel ámbitu de la investigación y la tresferencia, la medría de gastu enerxéticu y los ámbitos de collaboración ente les universidaes en materia de formación virtual y movilidá.

 

En concretu, a lo llargo de la xunta apuntóse la necesidá de marcar criterios coordinaos ente les Xerencies pa la estabilización de les places. Na sesión tamién s'espresaron les esmoliciones y duldes en relación cola aplicación de la reforma llaboral y, concretamente, nel ámbitu de les indemnizaciones de los contratos llaborales d'investigación y tresferencia  y, d'ende, que la Comisión Sectorial de Xerencies reclame que la tramitación parlamentaria de la llei de la Ciencia apurra seguridá xurídica énte estes cuestiones.

 

Coles mesmes tratóse la obligación d'adoptar midíes pa faer frente a los altos precios de la enerxía y, por tanto, llograr una mayor sostenibilidá social, económica y ambiental d'estes instituciones públiques.

 

A lo último, analizóse la evolución del Plan de Formación del Personal d'Alministración y Servicios del G9 y los datos de la presente edición. En concretu, la ufierta formativa que va empezar el 25 d'abril presenta 49 cursos que segurián un total de 1986 persones. Esos usuarios van esfrutar de les 2450 places ufiertaes na presente edición.