El Conseyu de Gobiernu aprueba la ufierta de places académiques de nuevu ingresu para'l cursu 2022-2023
La Universidá d'Uviéu va ufiertar un total de 6.638 places para l'estudiantáu de nuevu ingresu nos sos 118 estudios de Grau y Másteres | Aumenten a 200 places el númberu de places del Máster Universitariu en Formación del Profesoráu d'Educación Secundaria Obligatoria, Bachilleratu y Formación Profesional | Nel so informe, el rector esbilló'l calendariu para l'aprobación de los planes estratéxicos, que se van presentar en Claustru a finales d'abril
El Conseyu de Gobiernu de la Universidá d'Uviéu aprobó güei en xunta estraordinaria la so ufierta académica de nuevu ingresu para'l cursu 2022-2023 tantu para los estudios de grau como de máster. La ufierta formativa de la institución docente para alumnos de nuevu ingresu va sumar el próximu cursu académicu 6.638 places (4.877 para los graos y 1.761 para los másteres). La ufierta global de titulaciones va ser de 118 estudios (60 Graos y 58 Másteres).
Ente les novedaes, destaca l'aumentu hasta 200 places nel Máster Universitariu en Formación del Profesoráu d'Educación Secundaria Obligatoria, Bachilleratu y Formación Profesional, que nel añu anterior cuntaba con 190 places. Como esplicó'l vicerrector de Xestión Académica, José Miguel Arias, "sabemos que ye un aumentu pequenu, pero cumple colo almitío pola Conferencia Xeneral de Política Universitaria". Amás, el procedimientu inclúi la posibilidá de matrícula condicionada n'estudios de Máster Universitariu a estudiantes a los que los reste por superar el Trabayu Fin de Grau y a lo más hasta 9 creitos, tal que se recueye nel nuevu Real Decretu d'enseñances universitaries. El procedimientu garantiza, como esixe la norma, la prioridá de los estudiantes que disponen del títulu de grau. Adelántrase tamién la fecha d'entamu de la preinscripción, que va dir del 1 de marzu al 9 de xunu y la matrícula va ser ente'l 4 y el 31 d'agostu.
Na xunta de Conseyu de Gobiernu aprobóse tamién la renovación de les comisiones del Conseyu de Gobiernu pa la inclusión de conseyeros escoyíos pol Claustru, la tercera asignación de Collaboración Docente y el cambéu del plan d'estudios de Grau de Xeoloxía y del programa de doctoráu n'Economía y Empresa, ente otres cuestiones.
Calendariu pa los planes estratéxicos
Per otra parte, el rector de la Universidá d'Uviéu, Ignacio Villaverde, treslladó nel so informe un calendariu pa l'aprobación de los Planes Estratéxicos de la institución. En concretu, esplicó la intención de celebrar un claustru monográficu sobro les propuestes el día 1 d'abril, aprobar los documentos de forma definitiva nel Conseyu de Gobiernu del 29 d'abril y yá en mayu, en Conseyu Social.
Galería d'imaxes
