El periodu de participación para escuchar la opinión de la comunidá universitaria sobro los planes estratéxicos de la Universidá d'Uviéu, presentaos el pasáu 31 de xineru, concluyó güei cola aportación, per parte de los miembros de la comunidá universitaria, de casi 300 propuestes. El rector de la Universidá d'Uviéu, Ignacio Villaverde, amosóse bien satisfechu coles resultancies d'estes dos selmanes d'información pública. "Como esperábamos, atopemos con una comunidá universitaria bien arreyada y que reaccionó positivamente a la nuesa propuesta de participación", esplicó. 

 

La mayor parte de les propuestes recibíes, más de dos tercios, son referíes al documentu que plantega un nuevu modelu d'organización, y tienen que ver, en munchos casos, con consultes individuales rellacionaes con puestos de trabayu, organización de servicios o propuestes de meyora. Pela so parte, el Plan Tresañal de Ciencia, recibió menos d'una decena de comentarios, la mayoría bien propositivos y específicos y qu'aluden a cuestiones práctiques. Por poner dalgún exemplu, propónse que contemple ayudes pa gastos de traducción y revisión de testos o realizar una campaña informativa sobro'l portal d'investigador. 

 

El plan d'infraestructures recibió xuna ventena de propuestes. A la espera d'un analís pormenorizáu de toles comunicaciones, en munchos casos son cuestiones bien concretes que se van tener en cuenta a la de desenvolvelo. Por casu, xuna de les aportaciones señala la posibilidá de poner plaques solares n'instalaciones deportives universitaria. Otres son unviaes por departamentos o árees en relación colos centros propuestos pa distintos tresllaos, y nelles, indiquen les sos necesidaes d'espacios nel casu de cambeos d'allugamientu. 

El plan de titulaciones llogró en redol a 50 suxerencies. Dalgunes d'elles son matices de la información afigurada nel plan y pidimientos d'ampliación d'información. Tamién se rexistró'l pidimientu per parte de la Escuela Politécnica de Mieres de reconsiderar el caltenimientu del grau de Geomática o la de la Escuela Politécnica d'Inxeniería de Xixón pa replantegase la necesidá d'enllantar el grau d'Enerxía Anovables y la adscripción d'este a los distintos centros. Pela so parte, la Escuela de Mines d'Uviéu realizó un total de 15 propuestes al plan de titulaciones, ente les qu'inclúi la qu'afecta a la fusión de centros. 

 

Los pidimientos recibíos provienen de centros, departamentos, de miembros de la comunidá universitaria con calter individual y tamién d'otros axentes sociales. El rector de la Universidá d'Uviéu, Ignacio Villaverde, amosóse bien estimáu "pola activa participación de la comunidá universitaria y otros axentes comenenciudos". Amás, señaló que se van estudiar y van analizar toles aportaciones y va valorase cómo pueden incorporase a los planes estratéxicos". "Con toles propuestes ya idees, vamos llograr unos planes estratéxicos más ricos, más sólidos y más compartíos pola comunidá universitaria, que yera lo que siempres pretendimos, qu'estos nun sían solo los planes estratéxicos d'un equipu rectoral sinón xuna estratexa de toa y pa tola institución", concluyó.