La Cátedra Xixón Azul surdió col oxetivu fomentar la formación, la investigación y la tresferencia de la conocencia nes árees de sostenibilidá y mediu ambiente, digitalización ya industria 4.0 y xestión y protección del mediu marín. La cátedra, frutu de la collaboración ente la Universidá d'Uviéu y el Conceyu de Xixón al traviés de Xixón Impulsa, ta allugada na Escuela Cimera de Marina Civil, nel Campus de Xixón, y ta dirixida pol profesor Rubén González. 

 

La cátedra, qu'empezó les sos actividaes a finales del pasáu añu, foi presentada oficialmente esta mañana nun actu desenvueltu nel Salón d'Actos de la Escuela Cimera de Marina Civil que cuntó cola presencia del rector de la Universidá d'Uviéu, Ignacio Villaverde; l'alcaldesa de Xixón, Ana González; el director de la cátedra, Rubén González, y el xerente de Xixón Impulsa, Luis Antonio Díaz. Mientres l'actu, apurriéronse los premios fin de grau y fin de máster a los meyores trabayos de la Universidá d'Uviéu nel ámbitu de la economía azul

 

La Cátedra Xixón Azul, enmarcada dientro del proyectu del mesmu nome, nació coles mires de promover ya intensificar les sinergias ente los actores participantes nesta iniciativa pa fomentar actividaes de formación, d'I+D+i n'árees d'interés estratéxicu rellacionaes cola redolada marina. Coles mesmes, la cátedra busca potenciar actividaes d'espardimientu y tresferencia de conocencia les mentaes árees d'interés.

 

Estes llínees estratéxiques, acordies con l'alcuerdu alcanzáu ente la Universidá d'Uviéu y Xixón Impulsa, son les siguientes:

 

Sostenibilidá y mediu ambiente: enerxíes marines anovables, descarbonización del tresporte marítimu, reciclaje de buques y eficiencia enerxética d'instalaciones náutiques/marítimes.

 

Digitalización ya industria 4.0: construcción y arreglu naval, tráficu marítimu y actividá portuaria, telecomunicaciones.

 

Xestión y protección del mediu marín: turismu marítimu y costeru, seguridá y protección costera y xestión del espaciu del mar.

 

La cátedra tien previstu desenvolver un ambiciosu programa de formación, investigación y espardimientu que se concreta nes siguientes actividaes:

 

Actividaes de formación

Xuna llabor importante de la cátedra va ser la detección de necesidaes formatives específiques de les empreses, instituciones y organismos venceyaos a la economía azul. Con esti fin, van desenvolvese cursos d'alta especialización aprovechando los recursos tantu de la universidá como de les empreses. Este va ser unu de los aspeutos de mayor caláu de la cátedra que va aprovechar l'alta capacidá formativa de la ciudá de Xixón, según los equipamientos ya infraestructures de toles instituciones arreyaes. 

 

Actividaes d'I+D+i

Les actividaes de fomentu de la investigación que va desenvolver la cátedra son bien amplies. De siguío, méntense dalgunes d'elles:

• Busca y desenvolvimientu de llínees conxuntes universidá-empresa. El so oxetivu ye fomentar la cooperación de los distintos grupos d'investigación de la Universidá d'Uviéu coles empreses por aciu la realización de proyectos d'I+D+i qu'incluyan la posibilidá de facilitar collaboraciones pa personal universitario (profesoráu y estudiantes) n'instalaciones de la empresa n'Asturies. 

• Desenvolvimientu de trabayos d'investigación en collaboración universidá-empresa nes temes propuestes poles empreses del ámbitu. 

• Realización de tesis doctorales en temátiques d'interés de la economía azul, que busquen, amás, favorecer la formación de personal de la empresa pal llogru del títulu de doctor. 

• Organización d'alcuentros, seminarios y talleres con espertos tantu nacionales como internacionales n'ámbitos d'interés. 

• Vixilancia científicu-tecnolóxica que dexe identificar desenvolvimientos d'interés conxuntu. 

• Cooperación pa llograr proyectos d'investigación nos ámbitos rexonal, nacional y européu o internacional. 

• Puesta en marcha d'un concursu añal d'idees innovadores en proyectos rellacionaos coles árees d'interés de la cátedra pa estudiantes de máster o d'últimu cursu de grau de la Universidá d'Uviéu.

 

Actividaes d'espardimientu y tresferencia

Ente les actividaes que va implementar la cátedra pueden citase, a manera d'exemplu, les siguientes:

• Facilitar la tresferencia de tecnoloxíes diseñaes al traviés de los proyectos d'investigación dende la universidá a la empresa.

• Collaborar nel espardimientu y comunicación de les actividaes d'I+D+i por aciu la publicación d'artículos científicos y la participación en congresos.

• Entamar sesiones conxuntes de divulgación que cunten cola participación de •

profesionales del ecosistema Xixón Azul y de la Universidá d'Uviéu.

• Collaborar na tramitación de posibles patentes surdíes de les actividaes d'I+D+i realizaes de forma conxunta.

• Fomentar la participación de profesionales de la empresa en cursos entamaos pola Universidá d'Uviéu.

 

Col fin de garantizar el bon funcionamientu, según la consecución de los sos oxetivos, la cátedra cunta con una dirección qu'ostenta nestos momentos el director de la Escuela Cimera de Marina Civil de la Universidá d'Uviéu y con una comisión de siguimientu formada por representantes de distintes instituciones de Xixón Azul.  

 

Relación de premiaos

Mientres l'actu apurriéronse los premios de la cátedra nes sos trés categoríes: Sostenibilidá y mediu ambiente, Digitalización ya industria 4.0 y Xestión y protección del mediu marín, tanto pa los meyores trabayos fin de grau como fin de master. La relación de galardonaos ye la siguiente:

 

Premios Meyor Trabayo Fin de Grau

Categoría Sostenibilidá y mediu ambiente

Alumnu: Yago Iván Baragaño (Grau en Bilogía)

Títulu: Caracterización del procesu sucesional en llurdios esplotaos polos perceberos. 

Tutor: José Luis Acuña Fernández 

 

Digitalización ya industria 4.0

Categoría erma

 

Xestión y protección del mediu marín

Alumnu: Aitor Marqués Alonso (Grau en Náutica y Tresporte Marítimu)

Títulu:  La inspección pesquera n'España Tutor: 

Luis Antonio García Martínez

 

Premios Meyor Trabayo Fin de Máster 

Categoría Sostenibilidá y mediu ambiente Alumnu:

Fernando Soto Pérez (Máster Universitariu n'Inxeniería de Caminos, Canales y Puertos)

Títulu: Potencial de producción d'enerxía eléctrica por aciu plantes solares fotovoltaicas flotantes n'España Tutor:

Mario López Gallego y Zenaida A. Hernández Garrastacho

 

Digitalización ya industria 4.0

Alumna: Aitana Sánchez González (Máster en Náutica y Xestión del Tresporte Marítimu)

Títulu: Aplicaciones del COLREG (Reglamentu internacional pa prevenir abordaxes) nos sistemes anticolisión

Tutor: Alberto Tablón Vega y Marlene Bartolomé Sáez

 

Xestión y protección del mediu marín

Alumna: Jaclyn Higgins (Máster en caltenimientu marín)

Títulu: Analysis of ocla (Gelidium corneum) extraction along the Asturian coast and its influence on the sustainability of the resource

Tutor: José Manuel Ricu Ordás