Más d'un centenar d'alumnos de segundu cursu de Bachilleratu de 21 centros educativos van participar mañana vienres na XV Olimpiada Asturiana de Bioloxía (OAsB) que se va desenvolver de forma presencial na Facultá de Bioloxía de la Universidá d'Uviéu. Esti certame tien como finalidá promover nos mozos l'interés pola conocencia de la bioloxía y fomentar una cultura científica, investigadora y de preservación del mediu natural.

 

La olimpiada consiste na realización d'una prueba tipu test de los conteníos de Bioloxía incluyíos nos programes d'esta asignatura de primer y segundu cursu de Bachilleratu. Los trés ganadores de la fase asturiana van participar na fase nacional qu'anguaño se celebrará tamién n'Asturies ente'l 31 de marzu y el 3 d'abril y van recibir amás dellos regalos apurríos polos patrocinadores. Coles mesmes, los alumnos distinguíos na fase asturiana van poder aportar a un entrenamientu prácticu de llaboratoriu en diverses árees de conocencia (Botánica, Fisioloxía Vexetal, Zooloxía, Bioquímica o Xenética) nel Bio-Campus que se va celebrar nos meses de febreru-marzu.

 

Los delegaos universitarios del eventu, el profesores Candela Cuesta Moliner (Fisioloxía Vexetal) y Eduardo Cires Rodríguez (Botánica), dambos pertenecientes al Departamentu de Bioloxía d'Organismos y Sistemes, destaquen la gran acoyida d'esta XV edición, que retoma la presencialidad tres el parón obligáu pola pandemia, y promueve de la mesma l'alcuentru ente la universidá y los estudiantes, que se van incorporar a la institución académica nun futuru.