El rector de la Universidá d'Uviéu, Ignacio Villaverde, acompañáu de parte del equipu rectoral, presentó güei, en xunta estraordinaria de Conseyu de Gobiernu, los planes estratéxicos para la institución. Los cuatro documento -Plan Estratéxicu de la Universidá d'Uviéu, Plan Estratéxicu de Titulaciones, Plan Xeneral d'Infraestructures y Plan de Modelu d'Organización de la Estructura Alministrativa de la Universidá d'Uviéu- dibuxen un proyectu d'institución moderna, participativa, con una ufierta académica actualizada y unos campus con personalidá propia". Toos ellos van pasar agora por un procesu d'información pública que pretende cuntar cola participación de la comunidá universitaria, y que va concluyir a mediaos de febreru. 

 

Villaverde esplicó a los miembros del Conseyu de Gobiernu'l procesu qu'empieza güei cola presentación de los planes, y que va siguir tres el periodu participativu col estudiu ya incorporación de propuestes, la so aprobación en Conseyu de Gobiernu y Conseyu Social y el so pasu pol Claustru Universitariu, probablemente nel mes de marzu. "Mientres los primeros diez meses de mandatu, l'equipu rectoral realizó un trabayu d'analís, estudiu de propuestes, necesidaes y conclusiones, que ye lo que güei compartimos cola comunidá universitaria. Agora queremos escuchar la so respuesta para, a partir d'equí, poner en marcha les distintes acciones que nos lleven a consiguir una Universidá d'Uviéu meyor", manifestó'l rector.

 

El primeru de los planes presentaos, el Plan Estratéxicu, fixa unes metes al mediu plazu y sirve de paragües para'l restu de documentos. Amás, define los mecanismos de coordinación y collaboración necesarios para llevar a cabu les distintes acciones, según para'l siguimientu y la presentación de les resultancies. El plan define cuatro prioridaes para reasitiar a la Universidá, y seis árees d'acción para optimizar servicios y asina ameyorar la so contribución ya impactu. En concretu, les cuatro prioridaes, les exes tresversales del plan, son la digitalización, la sostenibilidá institucional, la conexón ya impactu y l'especialización. Les seis árees d'acción, les sos exes verticales, son les persones, les infraestructures, la gobernanza, la docencia y los planes d'estudiu, la investigación y los servicios. 

 

Les metes señalaes son, ente otres, llograr un tresformamientu en fondura pa una universidá digitalizada; con servicios axilosos, seguros y accesibles; trabayar nun cambéu na forma de pensar y actuar p'asegurar la sostenibilidá funcional, social, económica y ambiental de la universidá, ameyorar les resultancies de la comunicación y les collaboraciones dientro de la Universidá, y ente ella y la so redolada económico y social y convertise nun motor reconocíu pa la tresferencia de cultura y riqueza.

 

Los primeros pasos pa llograr esto yá se dan cola presentación de los planes específicos de titulaciones, organización, infraestructures y que se suman al yá fechu públicu la pasada selmana: el Plan Tresañal de Ciencia. Nellos, recuéyense les primeres propuestes que llevaríen a la consecución de les metes señalaes nel plan estratéxicu institucional, propuestes p'avanzar escontra unos campus más cohesionados, con personalidá propia y nos que se cubrir les sos necesidaes estructurales, escontra una ufierta académica moderna, actualizada y acorde a les necesidaes que demanda la sociedá o faía xuna estructura del sieglu XXI, más efectiva y sostenible.

 

Bases pa definir la ufierta formativa

El Plan Estratéxicu de Titulaciones, desenvueltu pol Vicerrectorado de Xestión Académica, sienta les bases pa definir la ufierta formativa de la Universidá d'Uviéu, con oxetivos específicos como la reordenación de la ufierta d'estudios pa ganar eficiencia y competitividá, la incorporación de les novedaes introducíes na normativa recién (mención dual, programes académicos con percorríos socesivos de grau y máster n'inxeniería…) o la implantación de nueves titulaciones n'ámbitos estratéxicos pa la sociedá y pa la Universidá, qu'esploten sinergias y refuercen la competitividá de la institución. Pa les sos conclusiones, realizóse un analís internu, teniendo en cuenta variables como los datos de matrícula, los datos de EBAU, les redundancies en graos, la matrícula dende Asturies a otres universidaes, la tasa d'abandonu, el costu de les titulaciones o los espacios y profesoráu disponibles. Amás, establécense un indicadores pa la valoración de nuevos títulos agora o nel futuru. 

 

Unos campus universitarios referentes

Pela so parte, el plan d'infraestructures, realizáu de forma conxunta ente'l Vicerrectorado de Sostenibilidá, Movilidá y Mediu Ambiente y la Vicegerencia d'Infraestructures, escuerre'l tresformamientu de los campus universitarios nuna redolada de conocencia onde la calidá de vida, la sostenibilidá ambiental, l'agregamientu d'axentes ya instituciones, los servicios d'atención a los estudiantes y l'urbanismu conviertan a los espacios universitarios nun referente pa la sociedá asturiana. Busca reorganizar y optimizar los espacios de trabayu p'afaelos a les nueves necesidaes docentes y organizativas y amenorgar los costos d'esplotación de los edificios universitarios,  cuantimás los gastos d'enerxía, ente otros oxetivos. Les distintes actuaciones plániense acordies con siete criterios: caltenimientu; edificación y reorganización d'espacios; rehabilitación enerxética; aforru d'enerxía n'instalaciones; equipamientos; seguridá y servicios xenerales. 

 

Conclusiones

Ente les conclusiones más destacaes del Plan Estratéxicu de Titulaciones atopa la considerancia de viabilidá del grau en Ciencies de l'Actividá Física y el Deporte, y el so adscripción a la facultá de Formación del Profesoráu y Educación, n'Uviéu,  por cuenta del allugamientu de gran parte del profesoráu y disponibilidad d'instalaciones propies. De la mesma manera, propónse realizar un estudiu de viabilidá del grau de Criminoloxía, según les posibilidaes de diseñar una Programación Conxunta d'Estudios Oficiales (PCEO) col grau de Derechu. Taría adscritu a la Facultá de Derechu. Tamién s'analizó la posibilidá d'enllantar un grau n'Inxeniería n'Enerxíes Anovables, pal que se va estudiar la so viabilidá incluyendo otros títulos de la ufierta colos que presenta posibles solapamientos. Propónse la so posible implantación en Mieres, nel centru resultáu de la fusión de la Escuela d'Inxeniería de Mines, Enerxía y Materiales d'Uviéu cola Escuela Politécnica de Mieres. 

 

Amás, analiza les nueves posibilidaes qu'introduz la normativa esistente, como los programes de mención dual o los programes académicos con percorríu socesivu. Nesti sentíu, considera que la Escuela Politécnica d'Inxeniería de Xixón ye'l llugar aparente pa enllantar la primer mención dual. Por ello, propón la valoración y empiezu del diseñu de la Mención Dual pal títulu d'Inxeniería Mecánica. Tocantes a los programes académicos con percorríu socesivu, que venceyen un grau y un máster nel ámbitu de la inxeniería, "la so puesta en marcha en Xixón va faer más curiosu l'entamu de los estudios de grau que los componen y asitiaría a la escuela al nivel de les grandes politécniques", esplicó'l rector. 

 

Pa poder realizar estes propuestes del plan de titulaciones tuviéronse en cuenta les conclusiones del plan d'infraestructures. Nél, refléxase que, na estratexa xeneral de reorganización d'espacios, tien de contemplase de forma dixebrada la situación especial de los campus de la zona centro d'Uviéu: "Plantegen un retu inmediatu polos evidentes problemes d'espaciu qu'amás apinó la pandemiasobremanera nes Facultaes de Ciencies y Formación del Profesoráu y Educación, y en menor midida, pero non menos imperante, na Escuela d'Inxeniería Informática". Pa dar una solución a esto al curtiu plazu, ensin perxuiciu de lo que resulte del plan pa los terrenes del antiguu HUCA (HUCAMP), y l'afitamientu d'un gran campus n'El Cristu, propónse reorganizar les Facultaes de Ciencies y Formación del Profesoráu y Educación emplegando l'espaciu disponible na redolada, col usu d'edificios como'l qu'alluga la Escuela d'Inxeniería de Mines, Enerxía y Materiales o les aules de mayor capacidá de la Facultá de Xeoloxía. Per otru llau, contémplense acciones destinaes al afitamientu del Campus d'El Cristu, treslladando la Facultá de Medicina y Ciencies de la Salú al HUCA, y l'Escuela d'Inxeniería Informática al Cristu.

 

El plan d'Infraestructures contempla otres acciones concretes como la ellaboración del Plan Director de Caltenimientu del Patrimoniu Históricu; la rehabilitación integral de les cubiertes de la Facultá d'Económiques; l'arreglu de la fachada y rehabilitación enerxética del Edificiu Verde; la rehabilitación del edificiu d'alministración y l'aulariu del Campus d'El Milán, con incorporación d'una fachada ventilada, plaques fotovoltaicas na cubierta y urbanización con criterios d'accesibilidá de la redolada, la urbanización de la plaza frente al Edificiu Severu Ochoa pal so usu como zona de socialización y tránsitu ente edificios; la rehabilitación de les instalaciones de la Facultá de Química o la remodelación de la instalación de protección contra quemes del Edificiu departamental oeste y llicitación de la residencia d'estudiantes (Xixón), ente otres.

 

Nueva organización

El tercer plan presentáu en Conseyu de Gobiernu foi'l del nuevu Modelu d'Organización de la Estructura Alministrativa, desenvueltu pola Xerencia y la Vicegerencia de Recursos Humanos, del que yá s'adelantraron a los centros les sos principales llínees y que tien por oxetivu simplificar la estructura alministrativa, asitiar a les persones como centru de la organización, n'equipos de trabayu más horizontales y tresversales, ameyorar la profesionalización con nuevos roles, nuevos perfiles profesionales y nueves capacidaes, optimizar la formación y la xestión de la conocencia ente los emplegaos y encetar el tresformamientu dixital de los procedimientos. Nél, propónense cuestiones como la creación de les oficines d'Inspección y Cumplimientu, d'Analís y Prospectiva o de Patrociniu y Mecenalgu o la reordenación del Institutu de Formación (INIE), pa convertise nun Institutu de formación de PDI y PAS, a la imaxe del Institutu Asturianu d'Alministración Pública Adolfo Posada. 

 

• Propuesta de plan estratégico
   
• Propuesta del plan de titulaciones
   
• Propuesta del plan de infraestructuras
   
• Propuesta del plan de ciencia 
   
• Propuesta de nuevo modelo administrativo

DOCUMENTOS DE PLANES ESTRATÉGICOS PENDIENTES DE APROBACIÓN EN CONSEJO DE GOBIERNO DEL 29 DE ABRIL DE 2022