La Universidá d'Uviéu y TotalEnergies roblaron esta mañana un conveniu pol cual dambes instituciones constitúin la cátedra TotalEnergies d'Analítica de Datos ya Intelixencia Artificial, que tien por oxetivu sirvir de plataforma para desenvolver actividaes d'investigación d'interés común, facilitar el desenvolvimientu de la conocencia y l'excelencia nel ámbitu de l'analítica de datos y l'intelixencia artificial aprovechando la capacidá d'ufiertar talentu de la Universidá d'Uviéu. 

 

El rector de la Universidá d'Uviéu, Ignacio Villaverde, qu'allegó a la firma del conveniu acompañáu de la vicerrectora de Tresferencia y Relaciones cola Empresa, Begoña Cueto, manifestó'l so prestu pola firma d'esti conveniu, que, una vegada más, cuenta col sofitu de la empresa. "Universidá y empresa tienen de dir siempres de la mano, y más nestes cuestiones de futuru, como l'analítica de datos o la intelixencia artificial". El rector recordó que "la Universidá tien la conocencia que'l texíu empresarial precisa para encarar los nuevos retos qu'estos tiempos de cambeos vertixinosos, somos capaces de pensar el futuru y d'esperimentalo". 

 

Pela so parte, Javier Sáenz de Jubera, presidente de TotalEnergies Eletricidá y Gas, espresó'l prestu de la compañía por contribuyir a esta cátedra porque, "nel nuesu planteamientu d'ufiertar una enerxía barata, llimpia y cercana, l'analítica ya interpretación de los datos dexa averar cada vez más al veceru, anovar, poner a les persones nel centru, antemananos a les sos necesidaes y ufierta-yos un meyor serviciu. Con esta collaboración apostamos amás por formar al talentu del futuru de la mano d'una institución educativa de prestíu como la Universidá d'Uviéu".

 

La cátedra, que cunta con cuatro años de vixencia, va tener ente los sos ámbitos d'actuación prioritarios la puesta en marcha d'acciones formatives como beques, práctiques, premios a los meyores espedientes o xornaes; actividaes d'investigación, como business case, llaboratorios d'idees o'l desenvolvimientu de trabayos d'investigación; y, a lo último, actividaes de divulgación como la celebración de meses redondes d'espertos, publicaciones, xornaes divulgatives, etcétera.

 

Na firma del conveniu, xuntu al rector de la Universidá d'Uviéu, Ignacio Villaverde y al presidente de TotalEnergies Veceros, Javier Saénz de Jubera, tuvieron presentes la vicerrectora de Tresferencia y Relaciones cola Empresa, Begoña Cueto; el director d'área de Tresferencia y Cátedres d'Empresa, Jorge García García y Luciano Sánchez Ramos, catedráticu de Ciencies de la Computación ya Intelixencia Artificial de la Universidá d'Uviéu, como director de la nueva cátedra.