Les primeres civilizaciones que s'establecieron na provincia de Llugo atoparon un regalu inesperáu, unos xacimientos de pizarra verde únicos nel mundu. La Unión Internacional de Ciencies Xeolóxiques (IUGS poles sos sigles n'inglés), creó la figura de Roca Patrimonio de la Humanidá que tien por oxetivu salvaguardar la riqueza cultural y hestórica de determinaos minerales. Víctor Cárdenes Van den Eynde, investigador del Departamentu de Xeoloxía de la Universidá d'Uviéu, miembru de la comisión de la IUGS que tendrá d'otorgar esta reconocencia, propunxo que la pizarra verde seya la nueva Roca Patrimoniu de la Humanidá.       

 

L'investigador Cárdenes recuerda la hestoria d'esti mineral y el so emplegu en construcciones emblemátiques de la provincia de Llugo. Los asentamientos castreños, como'l de Viladonga, en Llugo, tán fechos con esta roca singular, que darréu foi emplegada polos romanos p'alzar edificaciones, ente elles, la muralla de Llugo, que tien partes feches con pizarra.

 

 Na Edá Media, les Diócesis de Llugo y Mondoñedo usaben la pizarra en bona parte de los sos edificios eclesiásticos. D'esta dómina data, por exemplu, la primer cantera de pizarra documentada en Galicia. En 1626, la construcción de la ilesia de Santiago Adelán riquió plaques de pizarra pa la so cubierta, que foron apurríes poles canteres de Llavapiés, a pocos kilómetros al noroeste de Mondoñedo.

 

L'investigador de la Universidá d'Uviéu señala que, anguaño, esta pizarra sigue esplotándose nos conceyos de Pol y Bretoña, con una gran aceitación tantu nacional como internacional. "El pasu de los sieglos forxó una relación estrecha ente paisaxe, cultura y piedra. Hai zones de la provincia de Llugo que nun s'entenderíen ensin el valor arquitectónico y paisaxístico que crearon sieglos d'usu de pizarra verde", esplica.

 

La creación de la figura de Roca Patrimonio de la Humanidá supon una salvaguarda pa'l patrimoniu histórico y cultural de les construcciones edificaes con estos minerales. Un bon exemplu, indica Cárdenes, pue ser el mármol de Carrara, esplotáu polos romanos dende fai más de dos milenios, col que se construyeron dalgunos de los edificios más importantes del Imperiu, amás d'emplegase pa esculpir obres artístiques, como'l David de Miguel Ángel. Dende l'añu 2017, esta roca ta reconocida como Roca Patrimonio de la Humanidá, la mesma distinción a la qu'opta la pizarra verde de Llugo. "Les ventayes que suponen esta reconocencia son innumberables, yá que inclúin la puesta en valor d'esti recursu, el so usu na arquitectura tradicional, y por estensión, el paisaxe y l'hestoria de Llugo", conclúi.