Una trentena d'alumnos de la Universidá d'Uviéu figuren ente los meyores titulaos en graos y másteres d'España acordies con el ranking qu'ellabora cada añu la Sociedá Española d'Excelencia Académica (SEDEA). Ocho d'estos estudiantes apaecen amás clasificaos nos trés primeros puestos del país dientro de les sos respectives titulaciones. Esta sociedá llama l'atención sobre'l elevadísimo porcentaxe d'estudiantes de la Universidá d'Uviéu qu'ocupen les primeres posiciones del ranking nacional teniendo en cuenta'l númberu total d'alumnáu de la institución académica.

 

En concretu, figuren en primer posición nacional los estudiantes Clara Rodríguez Blanco (Comerciu y Marketing), Matías Álvarez Rodríguez (Inxeniería Enerxética) y Patricio José Martínez García (Arquitectura). Apaecen en segundu llugar nacional Karolly Kayanny Silvino De Souza (Inxeniería Minera), Carlos Díaz Santos (Hestoria) y José Luis del Ríu Rodríguez (Inxeniería Química). Ocupen la tercer posición del ranking de los meyores alumnos del país Noelia Blanco Agudín (Bioloxía) y Jaime García Fernández (Psicoloxía). 

 

El vicerrector d'Estudiantes, Alfonso López Muñiz, a'gradeció'l so esfuerzu a los alumnos y pidió-yos que ‘'sigan llevando'l nome de la Universidá d'Uviéu allá onde vaigan''. López Muñiz dexose ver amás satisfechu polos escelentes resultaos obteníos pol estudiantáu de la universidá asturiana nesta clasificación.

 

SEDEA tien como misión principal identificar y acreditar a los meyores estudiantes de grau y máster del país, poner en valor los sos méritos académicos y contribuyir dende múltiples enfoques al so ésitu llaboral. Los estudiantes clasificaos nos primeros puestos coinciden en destacar la calidá de la formación recibida na Universidá d'Uviéu. 

 

Clara Rodríguez Blanco, númberu 1 en Comerciu y Marketing

Esta alumna, qu'anguaño cursa'l Máster en Internacionalización Económica: Xestión del Comerciu Internacional na Universitat de València, guarda bien bona alcordanza de la so formación na universidá asturiana. "Mentiría si nun dixera que de lo meyor que me dio la carrera fueron los compañeros y amigos que conocí. Tovía ansí,  tengo que dicir que d'estos años llevome conmigo'l crecimientu personal", destaca. "En cada cursu vas conociendote y moldiandote un pocu más, tamién quites el mieu a fallar. Tuvi la suerte de coincidir con profesores que fixeron qu'esti camín fora más enriquecedor pola calidá de la so enseñanza. Faciendo balance y agora viéndolo dende otra perspectiva, creo que tol tiempu dedicáu tuvo bien invertíu y, a la fin. la formación, por dura que sía, siempres merez la pena". 

 

Sobre'l so futuru, esta egresada prefier marcase pequenos retos a curtiu o mediu plazu, entá más, nel contestu de la pandemia. "Nun podría o nun m'atrevo a dicir ónde voi tar nunos años o a definir el puestu de trabayu ideal, pero sí que me gustaría que fora aquel nel que pueda apurrir la mio conocencia como granín d'arena y nel que sía útil pa faer meyor les coses", afirma. "Con compromisu y actitú creo que puede llegase a tresformar positivamente o redirixir el camín que tomó hasta agora toa esta industria", diz.

 

Patricio José Martínez García, númberu 1 n'Arquitectura 

Esti alumnu, egresado n'Inxeniería Civil pola Universidá d'Uviéu, llogró'l primer puestu del ranking n'Arquitectura, carrera que cursó na Universidá Europea de Madrid. Patriciu José Martínez indica qu'unu de los elementos que se consideraron pa ocupar el primer puestu foi'l cursar estudios previos como los realizaos na universidá asturiana. Amás, acordies cola resolución de SEDEA, esti estudiante destacar por ocupar el primer puestu na categoría más competitiva de toes. "Toi bien feliz de recibir el premiu porque supon una reconocencia a otres formes de pensar, d'entender y practicar la inxeniería y arquitectura, del alloñamientu de formes de faer dominantes y escluyentes. De la universidá llevo ensin dulda aquellxs profesorxs, que me sofitaron casi de forma ciega cuando la nube taba enriba de mi y, bien especialmente, a Antonio Navarro; espero que los nuesos caminos vuelvan a topase. La valoración global ye positiva, pero siempres recordando los momentos duros y críticos que me fixeron maurecer a un ritmu esponencial como persona", señala.

 

Anguaño, estudia MUA (Máster Universitariu d'Arquitectura), da clases de proyectos na Universidá Europea, onde cursó arquitectura y ye investigador nel grupu AirLab d'esta mesma universidá. "Les mios mires llaborales pasen, una vegada termináu'l máster, por montar el mio propiu estudiu d'arquitectura ya inxeniería nun planu internacional, acompañáu de grandes talentos, siguir recuperando almes perdíes nel camín de la universidá y entrar en delles de les meyores universidaes de mundu como la Bartlett School of Architecture, l'AA, el Sci Arch, Columbia o'l ETH Zurich", sorraya.

 

Matías Álvarez Rodríguez, númberu 1 n'Inxeniería Enerxética

Esti tituláu destaca que'l máster d'Inxeniería Enerxética de la Universidá d'Uviéu, col que complementó los sos estudios de grau, apurrió-y les bases necesaries pa entamar los sos estudios de doctoráu. "Considero que les asignatures en rellación cola eficiencia enerxética na edificación y técniques de modeláu matemáticu n'inxeniería enerxética son aquelles nes que'l máster destaca, y son les que valoro más positivamente. El restu de conteníos ye polo xeneral son bonos tamién".

 

Matías Álvarez ta matriculáu anguaño nel programa de doctoráu d'enerxía y control de procesos na Universidá d'Uviéu. Amás, tamién cursa'l máster d'inxeniería industrial a tiempu parcial, coles mires de llograr el títulu de máster al tiempu qu'el de doctoráu. "De cara al futuru próximu, centrome na investigación dientro del marcu de la mio tesis doctoral, polo qu'atopo en procesos de presentación de solicitúes para llogru d'un contratu predoctoral en convocatories competitives (FPU, Severu Ochoa)", comenta.

 

Karolly Kayanny Silvino De Souza, númberu 2 n'Inxeniería Minera 

Esta egresada ta bien satisfecha cola formación recibida na universidá asturiana: "Definitivamente considero que'l Grau n'Inxeniería de Tecnoloxíes Mineres cumplió coles mios mires. Lo más destacable d'esta carrera ye la gran variedá d'especialidaes y asignatures impartíes y la relación alumnu/profesor, pues al ser  tan pocos, les clases son bien paecíes a clases particulares. L'ambiente ye casi familiar, toos conocémomos, tantu alumnos como docentes. Como únicu aspeutu negativu señalaría la gran cantidá d'hores lectives". L'alumna con segunda meyor clasificación nacional nesta área sigue venceyada a la Universidá d'Uviéu onde cursa'l Máster n'Inxeniería de Mines y cuenta con una beca de collaboración col Departamentu d'Esplotación y Prospección de Mines.

 

La so ilusión ye empezar a trabayar en cuanto remate esti primer cursu del master n'una empresa que de  desafíos para crecer laboralmente y, si ye posible, que requiera viaxar y entrar en contactu con otres cultures".  "Anque caltengo les puertes abiertes a toles oportunidaes, quixera desempeñar dalgún trabayu na industria de los esplosivos, les plataformes offshore o en dalguna central eléctrica", apunta.

 

Carlos Díaz Santos, númberu 2 n'Hestoria

"La mio esperiencia na Universidá d'Uviéu ye satisfactoria pola vocación que tenía y la determinación por faer esti grau dende pequeñu. Amás d'ello, el tener la esperiencia del programa de movilidá SICUE na Universidá de Granada foi un fechu bien importante na mio formación", comenta'l númberu 2 del ranking n'Hestoria. Anguaño, Carlos Díaz Santos realiza'l Máster de Formación del Profesoráu na Universidá d'Uviéu. Esti egresado quier siguir formándose. "De cara al futuru más próximu quiero siguir venceyáu al estudiu de la Hestoria col entamu de la mio carrera investigadora y la realización de la mio tesis doctoral", asegura. 

 

José Luis del Ríu Rodríguez, númberu 2 n'Inxeniería Química

Esti alumnu ufierta una valoración bien positiva de los sos estudios na Universidá d'Uviéu. "Creo que'l departamentu d'Inxeniería Química tien un personal bien cualificáu y competente, na so mayoría, que sabe tresmitir la conocencia a los alumnos de forma satisfactoria y siempres ta dispuestu a ayudar, pero al empar siendo bien esixente nos actos d'evaluación", indica. Dempués de faer una estancia Erasmus y el Máster n'Inxeniería Química fuera d'Uviéu, esti egresado valora entá más tolo aprendío na Facultá de Química, "yá que nos prepara perbién pa les salíes llaborales o académiques fuera de la universidá d'orixe y nos proporciona una bona base científica desendolcando en nós una capacidá de trabayu y esfuerzu bien grande. 

 

Anguaño, José Luis del Ríu Rodríguez cursa'l segundu añu del Máster Universitariu n'Inxeniería Química na Universidá Politécnica de Valencia (UPV), al empar que realiza práctiques nel Institutu de Tecnoloxía Química (ITQ), un centru mistu d'UPV y CSIC, nel campu de la síntesis de materiales y catálisis. "Les mires llaborales que tengo nun futuru más próximu ye realizar estudios de Doctoráu nel campu de la Inxeniería Química, anque nun refugo la empresa privada", apunta.

 

Noelia Blanco Agudín, númberu 3 en Bioloxía 

"Toi satisfecha colos mios estudios en Bioloxía de la Universidá d'Uviéu, polo xeneral, el grau correspondió a les mies mires. Entá asina, hai asignatures nes que sí creo que ye necesariu un cambíu del so plantegamientu y plan d'estudios. Tamién ye ciertu que quiciabes se precisaría daqué más d'enfoque prácticu", apunta la graduada cola tercera meyor posición d'España en Bioloxía. Como'l restu de los alumnos d'esti ranking, sigue formándose, nel so casu, y en concluyendo'l máster, estudia'l primer añu del doctoráu en Bioloxía Molecular y Celular, tamién na Universidá d'Uviéu. Nel futuru, a Noelia Blanco gustaría-y poder dedicase a la investigación y la docencia. 

 

Jaime García Fernández, númberu 3 en Psicoloxía 

"Estudiar Psicoloxía n'Uviéu significó mucho pa mi. Toos entramos n'esta carrera con una idea sobre lo que ye esta disciplina, y nengunu de nós atina. Nel mio casu, pasé de querer interpretar suaños y analizar la mente inconsciente" a falar de conducta y analisis funcionales", indica. "Poder desfacete de les tos idees preconcebíes y reelaborarles de la mano de grandes figures de la psicoloxía española non solo fórmate no profesional, tamién te camuda no personal. La mio forma de ver el mundu agora ye bien distinta a la d'años tras, y nun creo que sía pol  fechu de cumplir años, sinón por faelo al llau de profesores apasionaos pol so trabayu. Ye daqué que yo y munchos colegues vamos llevar siempres con nós, dediquémomos o non a faer psicoloxía", añede. 

 

Jaime García, que s'atopa anguaño cursando'l doctoráu col Equipu de Psicometría de la Universidá d'Uviéu, quier siguir rellacionáu cola vida académica como docente n'investigación. "Sicasí, nun me gustaría qu'ello traxera la mio desconexón col mundu profesional/aplicáu. Desque entré na carrera, l'ámbitu forense llamóme poderosamente l'atención,  asina qu'espero dirixir el mio trabayu escontra'l so desendolcamientu", conclúi.

 

El restu de los alumnos destacaos por SEDEA na clasificación nacional son los siguientes y ocupen les siguientes posiciones:

 

 

Elena Álvarez Alonso, númberu 7 n'Alministración y Dirección d'Empreses.

Álvaro Argüelles Caamaño, númberu 25 n'Inxeniería Mecánica.

Rubén García Bayón, númberu 20 n'Inxeniería Industrial.

Enrique Amieva García, númberu 11 n'Inxeniería Química.

Diego Braña Bueno, númberu 12 n'Inxeniería Mecánica.

Carlota Losa Mediavilla, númberu 10 en Biotecnoloxía.

Luis Alfonso Martínez Palacios, númberu 35 n'Inxeniería Mecánica.

Álvaro Robayna Parres, númberu 36 en Derechu.

Sergio Álvarez Fernández, númberu 12 en Psicoloxía.

Lydia Castellanos Hevia, númberu 4 en Trabayu Social.

Laura Villanueva Gutiérrez, númberu 5 en Filosofía.

Marta Cima Fuentes, númberu 23 n'Alministración y Dirección d'Empreses.

Óscar García Luengo, númberu 8 n'Inxeniería Mecánica.

Jaime Arias Galán, númberu 5 n'Inxeniería de les Tecnoloxíes de Telecomunicación.

Sergio Usín García, númberu 4 en Bioloxía.

Irene Rodríguez Fernández, númberu 8 en Filoloxía Inglesa.

Pablo Iglesias García, númberu 22 n'Inxeniería de les Tecnoloxíes de Telecomunicación.

Marina Juárez Verdugo, númberu 9 en Maestru d'Educación Infantil.

Alejandro Irazusta Pérez, númberu 14 n'Economía y Empresa.

Jorge Álvarez Morán, númberu 18 n'Inxeniería Mecánica.

Claudia Vázquez Mayor, númberu 24 n'Alministración y Dirección d'Empreses.

Elías Carballido González, númberu 12 n'Hestoria.

César García Cabeza, númberu 32 n'Inxeniería Informática.

Fernando Argüelles Pérez, númberu 13 n'Inxeniería Química.

Paula García, númberu 10 en Marketing