Francisco Javier Ayala Gallardo, cola obra El to cantar ente los sos cantares. José Agustín Goytisolo y la música, llogró güei el VII Premiu Internacional d'Investigación Lliteraria "Ángel González", que convoca la Universidá d'Uviéu a traviés de la cátedra que lleva'l nome del poeta uvieín. El fallu del xuráu diose a conocer na Aula Rector Ales del Edificiu Históricu de la Universidá d'Uviéu, nun actu nel que se presentó amás La intimidá de los espeyos. Llectures de La otra sentimentalidad, obra de Félix Martín Gijón , ganadora de la pasada edición d'esti galardón. L'eventu cuntó tamién cola participación del poeta Luis García Montero, representante destacáu de la propuesta lliteraria qu'estudia esti llibru.

 

El xuráu del Premiu Internacional d'Investigación Lliteraria "Ángel González", presidíu por Carmen Adams, vicerrectora d'Estensión Universitaria y Proyección Cultural, alcordó dar el galardón a Francisco Javier Ayala Gallardo (Universidá Autónoma de Barcelona) por El to cantar ente los sos cantares. José Agustín Goytisolo y la música. El trabayu premiáu, que toma emprestáu'l títulu d'un versu de la célebre composición Palabres pa Julia, toca'l tema de les relaciones de la poesía de José Agustín Goytisolo cola música y fae un analís de les socesives apropiaciones de los testos de Goytisolo nes versiones cancioneriles, ente les que sobresal la llabor de Paco lbáñez.

 

El xuráu consideró que la sólida fundamentación teórica d'esti trabayu y el so enorme valor documental faen d'él un material de consulta imprescindible pa los estudiosos del cantar d'autor en xeneral, de les musicaciones de poesía en particular y, más en específico , d'algunos aspeutos cruciales que nos interesen dende la poética de José Agustín Goytisolo. El xuráu destacó tamién que ye un rigorosu trabayu académicu, de futuru con importante impactu nel campu de la conocencia, qu'honra, d'otra manera, la memoria y l'obra d'un de los poetes más relevantes de la lliteratura española contemporanea.

 

Al Premiu Internacional d'Investigación Lliteraria "Ángel González" puen participar trabayos en llingua española, de calter teóricu o críticu, sobre un tema tocante a la poesía hispánica de los sieglos XX y XXI. L'oxetivu d'esti galardón ye incentivar la conocencia, espardimientu, formación e investigación sobre aspeutos rellacionaos cola obra del poeta asturianu, la creación no tocante a lo lliterario y artístico y los estudios humanísticos.

 

El premiu ta impulsáu pola Cátedra Ángel González de la Universidá d'Uviéu, cola collaboración de la Fundación Banco Sabadell. Francisco Javier Ayala Gallardo va recibir los 5.000 euros como ganador del galardón y va poder amás ver reconocíu y publicáu el so trabayu nuna editorial que garantice'l so espardimientu nacional e internacional.

 

El xuráu encargáu de fallar el premiu tuvo presidíu pola vicerrectora d'Estensión Universitaria y Proyección Cultural, Carmen Adams, y foron tamién vocales la directora de la Cátedra Ángel González, Araceli Iravedra, la catedrática de Lliteratura Española de la Universidá de Valladolid María Pilar Celma Valero, el catedráticu de Lliteratura de la Universitat de les Illes Balears Francisco Díaz de Castro, qu'intervieno nel actu, y el profesor titular de Lliteratura Española de la Universidá de Castiella-La Mancha Ángel Luis Luján Atienza.

 

Félix Martín Gijón , ganador de l'anterior edición del premiu, recordó güei na presentación del so llibru que, nes llectures de los poetes sobre otros autores, suel mostrase'l calter de discutiniu íntimu, d'alderique priváu que caltien l'escritor consigo mesmu. L'estudiu galardonáu na pasada edición trata de rastrexar delles d'eses llectures pa metese n'una de les propuestes más complexes y suxerentes de la nuesa hestoria poética recién. Siguiendo les buelgues d'Antonio Machado, Rafael Alberti y Jaime Gil de Biedma a traviés de la mirada de los autores granadinos, la obra premiada percuerre los alderiques estéticos que con mayor insistencia marcaron el sieglu XX.

 

Los mitos de la pureza y les pantasmes del compromisu, la modernidá escontra la vanguardia y el realismu, la invención d'un personaxe o'l nomadismu de la escritura, ente diverses cuestiones, van desendolcándose  ente les páxines de La intimidá de los espeyos. Llectures de La otra sentimentalidá. Félix Martín Gijón  ye doctor pola Universidá de Granada. Publicó dellos trabayos n'editoriales y revistes especializaes atendiendo, fundamentalmente, al estudiu de la otra sentimentalidá , propuesta poética a la que dedicó la so tesis doctoral, puntu de partida del llibru. Pela so parte, Luis García Montero, poeta y representante más destacáu de la propuesta poética que s'estudia nel llibru, ufiertó mientres l'actu'l so personal testimoniu sobre lo que significó pa él