Dende Goya hasta Kurosawa, pasando por Chagall o Buñuel, munchos artistes visuales afiguraron los sos suaños nes sos obres. Pedro Lombardía de Lillo (L'Apurro, 1961) presenta agora na Sala d'Esposiciones de la Universidá d'Uviéu la so esposición Onírica, un trabayu integráu por 23 llenzos nos que l'artista revela los pensamientos más fondos del so universu creativu. L'amuesa, que s'inaugura'l 17 de payares, a les 19:00 hores, cola presencia de Carmen Adams, vicerrectora d'Estensión Universitaria y Proyección Cultural, va poder visitase nel Edificiu Históricu hasta'l 19 d'avientu. 

 

Pedro Lombardía de Lillo ye graduáu na Escuela d'Arte d'Uviéu y técnicu cimeru de programes interactivos. Trabayó tamién, amás de como artista plásticu, como director creativu en distintes axencies de publicidá, director artísticu en cine, humorista gráficu en prensa y revistes, ilustrador, guionista y realizador de Vídeu, diseñador gráficu, y en numberoses actividaes rellacionaes col mundu creativu.

 

"Cuando duermo descansu, cuando suaño non", señala l'autor d'Onírica nel catálogu qu'acompaña la esposición. "Resulta placentero, esmolecedor y misteriosu cualquier suañu de cualquier nueche. Los que tengan la fortuna de llegar a vivir 75 años, van pasase 25 d'ellos dormiendo, suañando", añede. "Nun podemos arrenunciar a esa esperiencia vital tan intensa y enllargada yá que mientres suañamos vivimos, sentimos allegría y carecemos sufrimientu; igual que cuando tamos despiertos, inclusive eses vivencies son más riques por non tener llendes físiques, morales o de la razón", comenta l'artista. Na so opinión, ye necesariu contemplar esos años de suaños como parte fundamental del nuesu viaxe per esti mundu. "Por eso yo quiero cuntar el mio periplu, entá inacabado por suerte, nesta amuesa na que caúna de les obres forma parte d'esa esperiencia ambigua, astracta, enllena de sensaciones, de ruios y formes que s'asoceden mientres suañu".

 

María José González Salas, profesora y especialista n'Hestoria del Arte, destaca qu'Onírica nun ye solo la descripción d'un suañu, son 23 llenzos que revelen el xeniu creativu del artista "porque Pedro pinta y cuando lo fai crea un mundu distintu con un llinguaxe conceptual onde s'entemez lo figurativo y lo astracto".

 

La profesora señala nel catálogu de la esposición que, al traviés de formes xeométriques, oxetos angulosos, llínees ondulantes, llurdios y esporádicamente naturaleza esquematizada, esos suaños afigurar en figures tridimensionales cola so propia identidá y perspectiva sobro los fondos planu y equilibráu de la composición. "La gama cromática ye lluminosa, vibrante… sobro fondos claros xeneralmente blancos y grises, remanecen llurdios y oxetos naranxes, ocres, azules, gris-plata, efectos metalizados y distintes testures", sorraya.

 

A xuiciu d'esta esperta, hai amás nes pintures de Lombardía de Lillo "daqué subliminal, ancestral que nos avera al arte prehistórico de signos puntiformes, pectiformes, onduliformes… a les pintures medievales francorrománicas de fondos blancos, a los llibros allumaos de miniatures brilloses, al mundu llíricu de Kandinsky o al surrealismu de Miró".