Asturies asítiase percima de la media española en capital humanu dedicáu a la investigación y l'innovación, especialmente nel empléu nel sector d'alta tecnoloxía, na formación n'educación cimera y na calidá de les publicaciones. Ye unu de los datos que revela l'últimu informe de la Cátedra de la Innovación (C_ANUEVA), presentáu esta mañana, y nel que tamién se pon de relieve que la rexón precisa amontar la inversión del sector priváu n'I+D+i para esguilar posiciones y converxer con Europa.

 

El documentu La I+D+i n'Asturies: una primer aproximamientu a la situación de la rexón nel contestu nacional y européu analiza les fortaleces y debilidaes respecto al restu de comunidaes. Na presentación participaron el conseyeru de Ciencia, Innovación y Universidá, Borja Sánchez; la vicerrectora de Tresferencia y Relaciones cola Empresa, Susana Menéndez Requejo; y el Director de la Cátedra Fernando Rubiera, que detallaron los principales datos.

 

En cuanto al potencial de la rexón para esguilar posiciones nel ámbitu de la investigación, el desenvolvimientu tecnolóxicu y l'innovación, l'analís d'indicadores revela qu'Asturies s'atopa ente'l 25% de les rexones meyor asitiaes en capital humanu. 

 

El Principáu destaca de forma sobresaliente, na cuarta posición, nel porcentaxe de trabayadores en sectores d'alta tecnoloxía. Asturies cunta con un 3,5% de población emplegada nesti ámbitu, un valor bien cercanu al del País Vascu.

 

Otra de les fortaleces ye la proporción de población ente los 25 y 64 años con educación terciaria, esto ye, que tien títulos de grau, máster universitariu y doctoráu. Asturies ocupa tamién la cuarta posición, con un 44% de población con estos niveles educativos, nel ranking de rexones y supera en 12 puntos la media europea. Asítiase amás nun llugar preponderante tocantes a númberu de tesis doctorales per cada millón d'habitantes.

 

Les solicitúes de patentes per millón d'habitantes, onde Asturies ocupa la sesta posición, ye otru de el indicadores positivos, al igual que la producción científica, que magar nun espunta en cuanto al númberu de publicaciones sí destaca en calidá. El Principáu ta ente les seis rexones con mayor porcentaxe d'artículos científicos más citaos.

 

Nes debilidaes, l'informe constata'l datu yá conocíu de la inversión d'Asturies n'I+D+i, un 0,82% del so PIB, ya identifica la mayor fienda nel sector priváu, con un valor un 34% per debaxo de la media nacional.

 

Un analís del esforcio inversor de les empreses asturianes por cañes d'actividá asitia'l puntu altu nes actividaes profesionales, científiques y alministratives, como les ciencies sociales, naturales o la biotecnoloxía. La industria asturiano, que engloba metalurxa y productos metálicos, industria tresformador de los metales, l'alimentación, bebíes y tabacu y otres industries manufactureras concentra un 40% del gastu empresarial n'I+D+i de la rexón.

 

Los sectores nos que se rexistra xuna inversión n'I+D+i más amenorgada tán rellacionaos col comerciu, la enerxíes eléctrica, agua, gas y saneamientu. Ente que les actividaes peor asitiaes nesti contestu son la hostelería, agricultura y pesca, con una inversión prácticamente nula n'investigación ya innovación.

 

El indicadores analizaos revelen que les empreses asturianes son poco innovadores, pero les qu'anueven destinen un gran porcentaxe del so gastu a la I+D+i. De les 537 empreses innovadores d'Asturies, un 34% anueva tantu nel  productu como nel procesu de producción.

 

El documentu apuesta por fomentar  la creación de nueves empreses de base tecnolóxica y alerta sobro la necesidá de realizar un esforcio inversor n'I+D+i nel sector priváu que dexe a Asturies converxer coles cifres medies nacionales y europees. 

 

La Cátedra pal Analís de la Innovación n'Asturies (C_anueva) ta impulsada pola Conseyería de Ciencia, Innovación y Universidá en collaboración cola Universidá d'Uviéu y financiada al traviés de la sociedá de Xestión d'Infraestructures Públiques de Telecomunicación del Principáu d'Asturies (GITPA). Los informes y actividá de la cátedra pueden consultase al traviés de la so páxina web: https://www.cinnova.es/