L'alumnu de la Universidá d'Uviéu Pablo Menéndez Landa llogró'l primer Premiu Axalta al meyor estudiante del Máster n'Analís de Datos para la Intelixencia de Negocios (MANADINE). Pablo Menéndez Landa consiguió una gratificación económica de 3.000 euros, amás de la realización de les práctiques curriculares del máster en Axalta. Esti galardón tien un doble oxetivu. Per un sitiu, estrechar la collaboración ente la empresa y l'Universidá d'Uviéu y, por otru, la voluntá d'entender meyor dalgunos de los datos que se xeneren nel Centru Global de servicios de Axalta n'Asturies. 

 

Pablo Menéndez Landa quixo amosar el so agradecimientu tantu a la empresa Axalta como a la Universidá d'Uviéu y a los sos profesores: "Frutu de la collaboración universidá empresa tuvi la oportunidá, non solo de rematar los mios estudios pal llogru del títulu, sinón tamién d'empecipiar el desenvolvimientu d'un perfil profesional y d'arriquecer la mio crecedera personal d'una manera bien reconfortante", afirma. "El desenvolvimientu de les práctiques sirvióme p'aplicar les conocencies de les llecciones impartíes na aula d'una manera empírica y real nuna redolada empresarial, bien distintu al académicu. Coincidí con persones, como foi'l casu del tutor asignáu per parte de la empresa, Pablo, de les que tuvi la suerte d'aprender munches coses, tanto a nivel personal como profesional, y que yá dexaron la so buelga en mi", añede. 

 

L'alumnu galardonáu destaca que, por esti motivu, esti tipu d'esperiencies tendríen de ser vivíes por cualesquier estudiante universitariu por que pueda desenvolver les sos aptitúes y completar la so formación nuna redolada distinta al académicu. "Gustaríame animar a otres empreses a siguir l'exemplu de Axalta d'averar el mundu universitariu al llaboral, ufiertando places de práctiques al traviés de la Universidá d'Uviéu".

 

Nestos primeros meses de collaboración, Pablo Menéndez Landa pudo terminar y presentar la so TFM, con una evaluación escelente. Mientres esi tiempu tuvo la oportunidá de conocer amás el sistema operativu de Axalta, entender la estructura de tables de SAP, y collaborar con dellos equipos del Centru Global de servicios de la empresa. Pa esta collaboración, resultó clave la figura del mentor dientro de Axalta, nesti casu, Pablo Fernández, que fixo un siguimientu del proyectu y del aprendizaxe del estudiante en práctiques.

 

El coordinadores del Máster n'Analís de Datos pa la Intelixencia de Negocios de la Universidá d'Uviéu, Amelia Bilbao Terol y Manuel F. Montenegro Hermida, treslladaron la so felicitación a Pablo Menéndez Landa y destacaron que les práctiques n'empreses son d'induldable valor pal estudiantáu del máster, pos dexen l'acercamientu en condiciones óptimas al so próximu futuru llaboral.