La Universidá d'Uviéu, xuntu cola compañía Telecable, anueva la Cátedra Telecable de Redes de Nueva Xeneración, qu'actualiza una cátedra yá esistente y que tien ente los sos oxetivos el fomentu de la investigación, desenvolvimientu ya innovación nel ámbitu de les tecnoloxíes y servicios de telecomunicaciones. El conveniu pa la puesta en marcha de la cátedra foi robláu pol rector de la Universidá d'Uviéu, Ignacio Villaverde, y por Juan Acuña, director de Telecable.

 

La cátedra tien ente los sos ámbitos d'actuación prioritarios el desenvolvimientu conxuntu de llínees d'I+D+i, la realización de xornaes de divulgación técnica y tecnolóxica, la edición de publicaciones sobro temes d'interés nel ámbitu de la Cátedra, o la promoción n'acontecimientos científicos y técnicos. La formación ye otra de les árees d'actuación prioritaries, y nesti campu, dambes entidaes van collaborar nel diseñu y impartición de programes de posgráu, van poner en marcha ayudes formatives pa estudiantes de grau, máster, doctoráu y post-doctorales, premios a trabajo fin de grau o máster y tesis doctorales, y van financiase práctiques remuneradas d'estudiantes, tanto de grau como de máster y doctoráu.

 

El rector de la Universidá d'Uviéu, Ignacio Villaverde, estimó a Telecable la so continuidá nel apueste pola institución, y declaró que "con esta firma afitamos y potenciamos la relación ente la Universidá y l'empresa". Amás, añedió que "el nuevu conveniu propón nueves actividaes que resulten beneficioses pa dambes partes y pa la sociedá asturiana polo xeneral". 

 

Pela so parte, Juan Acuña, director de Telecable, esplicó que "en Telecable somos conscientes de que pa poder desenvolver el nuesu negociu nun basta con desempeñar el nuesu papel como operador de telecomunicaciones. Tenemos bien claro que ye fundamental contribuyir al desenvolvimientu de la redolada local por aciu actuaciones de compromisu social y en collaboración permanente con distintos organismos, nesti casu cola Universidá d'Uviéu". 

 

Nel actu de firma del conveniu allegaron tamién María Adaro, responsable de Comunicación de Telecable, la vicerrectora de Tresferencia y Relaciones cola Empresa, Susana Menéndez Requejo; y el director d'área de Tresferencia y Cátedres d'Empresa, Jorge García García.