La convivencia ente humanos y llobos ye posible siempres que les comunidaes rurales reciban les ayudes oportunes. Esta ye xuna de les conclusiones principales a la que llegó xuna investigación conxunta realizada poles universidaes de Leeds (Reinu Uníu) y Uviéu. El trabayu, financiáu pol Natural Environment Research Council del Reinu Uníu y publicáu na revista Frontiers in Conservation Science, aboga por ufiertar un mayor sofitu a les comunidaes rurales pa fomentar relaciones harmonioses colos sos vecinos, los llobos. 

 

Esi nuevu estudiu, nel que participó José Vicente López-Bao, investigador del Institutu Mistu d'Investigación en Biodiversidá (Universidá d'Uviéu, CSIC, Principáu), analizó trés estaos de convivencia de comunidaes rurales col llobu n'España: unu con presencia permanente de llobos; otru onde los llobos tornaron apocayá; y un terceru nel que s'espera que lleguen na próxima década. El investigadores esquizaron les distintes condiciones nes qu'humanos y llobos pueden llegar a coesistir. 

 

La investigación reveló que les condiciones ecolóxiques, económiques y sociales pa la convivencia nestes comunidaes variaron significativamente. Por casu, ente que los perros guardianes del ganáu (races de perros escoyíes pa defender el ganáu de los ataques de los llobos como, por casu, el mastín español) percíbense notablemente eficientes en delles comunidaes, n'otres, factores como la topografía o'l turismu fixeron que los habitantes atalantaren que yeren menos útiles.

 

Les investigaciones realizaes por esti equipu amuesen la importancia de trabayar con estes comunidaes p'atopar soluciones afeches a les sos necesidaes, en llugar de soluciones técniques y llegales xeneralizaes. "Entender les particularidaes que cada contestu rique pa implementar una midida de prevención de daños puede ayudanos non solo n'afaeles localmente p'aumentar la so efectividá, sinón a amontar les posibilidaes d'aceptación del so usu", destaca López-Bao.

 

L'autora principal, Hanna Pettersson, investigadora de doctoráu nel Institutu d'Investigación de Sostenibilidá de Leeds, pasó la mayor parte de 2020 viviendo en trés árees rurales d'España pa intentar entender los principales factores que determinen la coesistencia ente llobos y humanos. Pettersson señala que "los principales problemes pa les comunidaes rurales n'árees onde llobos y humanos comparten el territoriu en munchos casos nun tán causaos polos mesmos llobos, sinón poles presiones económiques y sociales qu'amenaciaben los medios de vida, les cultures y l'autonomía de les comunidaes locales". "Hasta agora sabíamos enforma sobro los factores que conducen a relaciones disfuncionales ente les dos especies, pero muncho menos sobro aquellos factores que fomenten xuna convivencia funcional", añede Pettersson en referencia a la novedá d'esta investigación.

 

El autores del trabayu indiquen que güei, gracies a múltiples factores como les lleis de caltenimientu y l'abandonu del rural, tamos viendo'l regresu y l'espansión de grandes carnívoros, como los llobos, por munchos tipos de paisaxes en toa Europa. "Nos últimos años, esisten rexistros de presencia de la especie en tolos Estaos Miembros de la Unión Europea de la Europa continental", señala López-Bao. "Esta ye xuna señal esperanzadora pal movimientu global de recuperación de la naturaleza, que ye xuna parte crucial pa faer frente a les crisis climátiques y de biodiversidá en cursu", destaca Hanna Pettersson. "Sicasí, pa garantizar qu'esti movimientu sía xustu y sostenible, ye importante que trabayemos de manera proactiva nes comunidaes que van compartir espaciu con estos grandes depredadores. En dellos casos, pueden xenerar beneficios económicos al traviés del ecoturismo y pueden apurrir una regulación natural de los ecosistemes, por casu, al caltener so control el númberu d'herbívoros", añede. "Invirtióse un gran esfuerzu en valorar los aspeutos negativos de la coesistencia. Sicasí, un aumentu del focu d'atención escontra los beneficios potenciales de la presencia d'estes especies puede tener un impactu positivu sobro la tolerancia a coesistir con estes especies" comenta López-Bao. 

 

La investigadora comenta que los llobos son criatures formoses almiraes por munchos, pero tamién causen problemes a les comunidaes agrícoles tradicionales, munches de les cualos yá son vulnerables por cuenta de les condiciones desfavorables del mercáu y la marxinación social. "La supervivencia d'estes comunidaes ye crucial pa caltener el so ricu patrimoniu cultural y práctiques sostenibles de producción d'alimentos y, poro, tenemos d'aseguranos de que se creen les condiciones fayadices por que puedan subsistir nel futuru. Los llobos tán tornando a llugares onde permanecieron ausentes mientres décades, dacuando sieglos, y los procesu de coadaptación con esta especie perdiéronse. El desafíu clave al qu'enfrentamos ye preparar y sofitar a les comunidaes por que puedan afaese y espolletar, gracies a el so regresu o, dacuando, a pesar d'él", indica la investigadora.

 

Métodos tradicionales pa convivir con llobos

Les práctiques ganaderes tradicionales, como l'usu de perros mastines, inda prevalecen en delles partes d'España, onde el pastores pastien el so ganáu n'amplies árees xeográfiques. Delles comunidaes, como na Sierra de La Culiebra (Zamora), vivieron al pie de los llobos mientres xeneraciones y adoptaron dellos métodos pa coesistir cola especie esitosos.  Por casu, protexen a los sos animales zarrándolos mientres la nueche, acompañándolos a cuerpu mientres el día y calteniendo perros guardianes del ganáu colos sos fataos en tou momentu. 

 

Pero estos métodos riquen muncho trabayu y son costosos, particularmente pa los pequenos llabradores que los sos marxes económicos de cutiu son bien estrechos, polo que ye importante sofitar la implementación d'estes midíes, yá que supon un esfuerzu extra y un costu de producción mayor, n'árees de presencia de la especie. "Les comunidaes rurales quedáronse, nel meyor de los casos, con pagos de compensación burocráticamente engarrosos ya ineficientes, si pueden demostrar qu'el so animal foi depredado por un llobu, lo que dacuando ye imposible", destaca la coautora del trabayu.

 

Pettersson repostia "si nun reconocemos y sofitamos a estes comunidaes, va ser casi imposible que tresmitan el so estilu de vida a les xeneraciones futures y vamos perder les conocencies y les habilidaes de quien vivieron con ésitu al pie de los llobos. Ensin sofitu, los ganaderos que conviven con esta especie siempres van tar en peor situación que los que viven en zones ensin llobos, y eso tresmite xuna señal equivocada. Precisamos que les comunidaes de convivencia espolleten, que dean un exemplu positivu ya ilustren a quien antemanen el regresu de los llobos que ye posible vivir con ellos". "N'Europa, tolos ganaderos y ganaderes, sían beneficiarios o non de les ayudes incluyíes na política agraria común, tienen que xuntase a una serie de mínimos requisitos llegales de xestión, qu'inclúin, ente otres coses, el caltenimientu de la fauna y los hábitats, o'l bienestar animal; y nel casu de la política agraria común formen parte de la condicionalidad de les ayudes. Dientro de la nueva estructura de la política agraria común, deber d'articular mecanismos pa introducir complementos acomuñaos a la coesistencia con grandes carnívoros, o llínees destinaes a favorecer la coesistencia ente la ganadería estensiva y el caltenimientu de grandes carnívoros, por casu, al traviés de los ecu-esquemes", destaca López-Bao.  

 

La investigación identifica exemplos de nuevos enfoques esitosos pa sofitar a les comunidaes locales y la coesistencia. N'Asturies, por casu, la Fundación pal Caltenimientu del Frangüesos punxo en marcha dende 2011 marcar Pro-Biodiversidad nos Picos d'Europa, un esquema de certificación qu'asegura xuna meyora del beneficiu netu pal productor de carne d'ovín en fataos remanaos de manera tradicional dientro de espacio Red Natura 2000. El productores xuntaos a esta marca comprométense, ente otres coses, a respetar la convivencia cola fauna y llogren, a cambéu, flexibilidá y fondos pa garantizar el so cumplimientu teniendo en cuenta les sos particularidaes locales. Esta iniciativa brinda a el productores la reconocencia pública de los sos servicios ambientales nes tiendes y restoranes onde se viende la so carne.

 

Condiciones pa la convivencia 

Los investigadores identifiquen cuatro condicionantes pa la coesistencia:

• Instituciones efectives pa brindar sofitu ya incentivos y tomar decisiones con criterios tresparentes y participativos, afaciendo les prioridaes globales de caltenimientu a les condiciones locales, y que puedan mediar nes disputes que surdan.

• Esistencia estable de poblaciones de grandes carnívoros: condiciones locales que dexen la persistencia al llargu plazu.

• Llexitimidá social: enfotu nes autoridaes encargaes d'adoptar midíes de xestión y aceptación pública tantu del procedimientu como de les resultancies del procesu de toma de decisiones.

• Baxos niveles de riesgu o vulnerabilidá: Xuna apuesta decidida pa la prevención de daños, embriviendo les interacciones negatives ente humanos y carnívoros, la resistencia caltenida de los medios de vida y la capacidá tanto de les persones como de los carnívoros p'afaer afaese a la coesistencia.