La Comisión Sectorial de Relaciones Internacionales del Grupu 9 d'Universidaes (G-9), formada polos vicerrectores y vicerrectoras con competencies en internacionalización de les 9 Universidaes, axuntóse de manera on line para encetar la situación d'Afganistán.

 

Esta xunta estraordinaria tenía como únicu oxetivu definir de forma conxunta una respuesta a los problemes que podríen presentar los refuxaos y abelugaes d'Afganistán que sían acoyíos n'España,  cuantimás no referente al accesu o continuación de los sos estudios universitarios. 

 

Nesta primera toma de contactu en relación a esta temática, los integrantes de la Comisión Sectorial de Relaciones Internacionales manifestaron la so esmolición especialmente pola situación de les muyeres afganes y les sos condiciones d'accesu a la universidá nes actuales circunstancies. 

 

De primeres, alcordóse que les universidaes del G9 van caltener contactos colos respectivos Gobiernos rexonales para coordinar acciones en relación a los refuxaos afganos qu'acueya cada comunidá autónoma. Tamién decidió trabayase en llínea con CRUE Universidaes para la interlocución col Ministeriu d'Universidaes, con al respective de la necesidá de flexibilización de los procesos d'accesu a les universidaes españoles d'estes persones.

 

Como acciones específiques del grupu, les Universidaes que conformen el G9 plantegaron ufiertar a los refuxaos y abelugaes cursos d'español al traviés de los sos Centros d'Idiomes, estudiando la posibilidá de complementalo con cursos ad hoc sobro diversos aspeutos culturales y dexando abierta la posibilidá d'ampliar la ufierta a les families.

 

Coles mesmes, nel intre del alcuentru, tratóse'l posible compromisu d'almisión nes Universidaes mientres se regula l'accesu de los mozos procedentes del país asiáticu (homologación de títulos, etc), al traviés de matrícules complementaries, o realización de títulos propios.