La Universidá d'Uviéu y el Club Asturiano de Calidad roblaron el 26 de xunetu un conveniu de collaboración que tien por oxetivu favorecer y fomentar la investigación en temes que contribuyan a la meyora de la xestión y la competitividá empresarial, según l'espardimientu y tresferencia de les resultancies llograes a les empreses. Dientro d'estes acciones específiques atópase la collaboración en proyectos d'investigación desenvueltos nel Departamentu d'Alministración d'Empreses de la Universidá d'Uviéu para l'analís de les esperiencies d'empreses socies del Club Asturiano de Calidad y el desenvolvimientu de planes d'acción que favorezan la meyora de la competitividá de les empreses analizaes.

 

Ente les temes d'investigación d'interés cabo destacar la implementación d'estratexes de servitización (ampliar les capacidaes d'una empresa pa ufiertar una mayor esperiencia pal consumidor final), el tresformamientu dixital y el desenvolvimientu de la Industria 4.0, la implementación d'estratexes de meyora continua (excelencia operacional o llean management) o la economía circular.

 

El rector de la Universidá d'Uviéu, Ignacio Villaverde, esplicó que, con esti conveniu, "non solo xeneramos conocencia sobro'l presente, sinón qu'ufiertamos conocencia sobro'l futuru". "Gracies a esti conveniu vamos poder apurrir a les empreses información de gran calidá, vamos poder diseñar los escenarios de futuru que dexe al texíu económico, industrial y social preparar pa lo que venga y asina, non solo solo ser más competitivos, sinón ser más competentes y llograr esa excelencia buscada". 

 

Pela so parte, el presidente del Club Asturiano de Calidad, Jesús Daniel Salas, manifestó que "xuno de los oxetivos del club ye'l de conectar persones, conectar organizaciones y dar visibilidá a les bones práctiques". "Esti conveniu danos la oportunidá de llevar a cabu esti oxetivu cola Universidá d'Uviéu", añedió. 

 

En virtú del conveniu robláu güei, el Club Asturiano de Calidad va favorecer la participación de les empreses acomuñaes nes investigaciones plantegaes nel senu de la Universidá d'Uviéu y dambes entidaes van collaborar coles mesmes na organización y xestión d'aquelles actividaes que garanticen l'espardimientu y tresferencia de les resultancies de la investigación a empreses, asociaciones y sociedá polo xeneral.