El proyectu de desenvolvimientu d'una aplicación móvil para monitorizar los efectos secundarios de les vacunes contra COVID-19, nel que participa l'estudiante de la Universidá d'Uviéu Luis Magadán, ganó'l concursu internacional d'idees Nodal Award Shark-Tank, un certame impulsáu pola Fundación IMFAHE (International Mentoring Foundation for the Advancement of Higher Education) para reconocer les iniciatives más innovadores diseñaes por equipos multidisciplinares.

 

El proyectu ganador, denomináu SARSPRO, tien por oxetivu desenvolver una aplicación móvil que va dexar non solo monitorizar los efectos secundarios causaos poles vacunes de la COVID-19, sinón tamién los causaos pola mesma enfermedá. La nueva APP, para la qu'inda nun hai un nome, va incluyir amás una serie de conseyos para sobrollevar meyor estos efectos adversos.

 

Luis Magadán, graduáu n'Informática y máster n'Inxeniería Informática, estudia anguaño'l doctoráu y ye amás profesor sustitutu d'Informática na universidá asturiana. El proyectu galardonáu ye frutu del trabayu colaborativo d'un equipu multidisciplinar integráu por estudiantes y docentes de les universidaes d'Uviéu, La Llaguna, Málaga, Sevilla, Politécnica de Valencia, UNAM de México, El MIT de Boston y l'empresa Salea Therapeutics de California.

 

"La nuesa idea ye que la APP, que va tar operativa n'una primer versión beta en trés o cuatro meses, pueda ser útil y de senciellu manexu para sobrollevar lo meyor posible los efectos secundarios causaos poles vacunes, pero tamién pola COVID", señala Magadán. Con esti propósitu, realizóse un estudiu de mercáu con más de mil encuestes que va dexar afinar el diseñu de la nueva aplicación. 

 

"El galardón supon un gran honor y una reconocencia a tol esfuerzu realizáu. Toos nós somos estudiantes de máster o doctoráu y tuvimos que sacar tiempu para poder compaxinar los nuesos estudios col proyectu", añede.

 

El proyectu SARSPRO foi escoyíu para participar nel programa VBP (Venture Building Program), diseñáu por mentores que cursen MBAs nel MIT y Harvard para promover y acelerar el desenvolvimientu de tecnoloxía n'Europa gracies a unu financiamientu inicial. Gracies a esta mentorización, l'equipu ganador confía n'atopar más financiadores para poder comercializar la so idea.

 

Luis Magadán pudo participar nel concursu d'idees gracies a la participación de la Universidá d'Uviéu nel International Mentor Program de IMFAHE. Esti programa ta destináu a reforzar el talentu de los estudiantes por aciu la so participación n'una rede internacional que-yos facilita'l contactu con científicos y profesionales españoles que trabayen en centros d'excelencia como Harvard, Stanford, Princeton, John Hopkins, North Carolina o'l Massachusetts Intitute of Technology (MIT).

 

IMFAHE ta presidíu por Zafira Castaño Corsino, d'orixe llangreanu y anguaño junior faculty instructor nel Departamentu de Medicina del Brigham and Women's Hospital de Harvard.

 

Luis Magadán encargóse al pie de otros compañeros d'equipu del desenvolvimientu informáticu de la APP. El proyectu ganador ta integráu amás por profesionales d'árees de la conocencia tan variaes como la medicina, la fisioterapia, la economía, les matemátiques, el comerciu o'l márketing. "Toi bien contentu cola formación recibida na Universidá d'Uviéu y gustaríame poder dedicame nun futuru a la docencia y a la investigación. Ye lo que más m'enllena", conclúi.