Un total de 137 investigadores participen nes décimes Xornaes Internacionales de Doctoráu de la Universidá d'Uviéu que tienen llugar güei nel Salón d'actos del edificiu científicu-técnicu del Campus de Mieres. Estes xornaes tán dirixíes especialmente a los estudiantes de doctoráu, tantu de la Universidá d'Uviéu como d'otres universidaes español y estranxeru, y tán abiertes tamién al restu de los colectivos qu'integren la comunidá universitaria. Tienen como oxetivu promover l'espardimientu de l'actividá investigadora de los doctorandos de les distintes cañes de la conocencia y favorecer la esposición de les resultancies llograes n'investigaciones y tesis doctorales.

 

Les xornaes fueron inauguraes esta mañana por Ignacio Villaverde, rector de la Universidá d'Uviéu; Cristina González Morán, directora xeneral d'Universidá del Gobiernu d'Asturies; Aníbal Vázquez, alcalde de Mieres, y Juan María Menéndez Aguáu, subdireutor de la Escuela Politécnica de Mieres. La universidá asturiana optó anguaño por un formatu híbridu --presencial y online-- que puede siguise al traviés del Campus Virtual de la institución docente. 

 

El rector dirixióse a los doctorandos y destacó que la investigación empieza con una tesis. "Una tesis ye sinónimu de dedicación, soledá, desorientación, de caminos que se transiten ensin resultancia, de momentos de desfallecimiento y desaliendu, de duldes ya incertidumes, y sobremanera… de trabayu, d'enforma trabayu", señaló.  "Ser doctor ye un salvoconducto que nos abrir les puertes de l'alta investigación porque nél contiense la certificación de que somos investigadores. Ser porque demostremos el tesón, la responsabilidá, el rigor, lo que ye garantía, quiciabes non d'aciertu nel nuesu propósitu, pero sí de la seriedá del trabayu realizáu". 

 

Villaverde tuvo palabres d'aliendu pa los doctorandos y pidió-yos nun esmorecer y dexase maraviar "por tanto saber, por tanta dedicación y esfuerzu, y por esa voluntá forxada nel silenciu del llaboratoriu, la biblioteca o'l despachu de construyir un mundu meyor al traviés d'una modesta tesis doctoral".

 

Tres l'apertura, la profesora María Ángeles Gil Álvarez, catedrática del Departamentu d'Estadística ya Investigación Operativa y Didáctica de la Matemática, pronunció una conferencia sobro l'analítica de datos y les sos aplicaciones. La sesión de la mañana sigue con una mesa redonda sobre la perspectiva de xéneru na investigación. Participen Rosa María Cid, catedrática d'Hestoria Antigua y vicepresidenta del seminariu d'Estudios de la Muyer de la Universidá d'Uviéu; Teresa Valdés-Solís Iglesias, científica del Institutu de Ciencia y Tecnoloxía del Carbonu (INCAR-CSICA) y presidenta de l'Asociación de Divulgación Científica d'Asturies, y Emilia María Durán, profesora del Departamentu de Filoloxía Anglogermánica y Francesa y coordinadora del Máster Erasmus Mundus n'Estudios de les Muyeres y el Xéneru na Universidá d'Uviéu. Coordina l'alderique Paz Menéndez Sebastián, directora de la Área d'Igualdá de la Universidá d'Uviéu.

 

Na sesión de tarde, yá en formatu virtual, van presentase 76 pósteres realizaos polos doctorandos correspondientes a les distintes árees de la conocencia: Arte y Humanidaes (11 pósteres), Ciencies (19), Ciencies de la Salú (12), Ciencies Sociales y Xurídiques (14), Inxeniería y Arquitectura (20).