El investigadores de la Universidá d'Uviéu Selina Kerscher y Matías Kippke, dambos del grupu Llaboratoriu d'Investigación Unificada de Xestión de la Enerxía Eléctrica (LEMUR poles sos sigles n'inglés), llograron financiamientu de la Fundación Phoenix Contact para desenvolver trabayos nel ámbitu de les redes eléctriques intelixentes. Estes investigaciones fueron los dos úniques que la Fundación Phoenix Contact decidió financiar n'una universidá fora d'Alemaña.

 

La Fundación Phoenix Contact financia añalmente una serie d'investigaciones alliniaes cola so misión empresarial y los sos principios de responsabilidá social corporativa. Les sos beques tán destinaes a promover el desenvolvimientu tecnolóxicu de la organización, contribuyir al so allugamientu estratéxicu, a los valores humanos, a la sostenibilidá y a la independencia para llograr un mundu diseñáu de forma sostenible.

 

Nesta ocasión, la fundación va financiar los estudios que la estudiante de doctoráu Selina Kerscher ta realizando nel programa de doctoráu del grupu d'investigación LEMUR. La investigación va tar centrada en "la xestión de la flexibilidá como elementu facilitador de la transición enerxética eficiente escontra la neutralidá del carbonu con mercaos eléctricos liberalizados". La fundación yá financia otra investigación del mesmu programa de doctoráu y mesmu grupu d'investigación sobro "infraestructura de midida avanzada pa la xestión de recursos flexibles" llevada a cabu pol estudiante de doctoráu Matías Kippke. Nesti casu, ta desenvolviéndose un demostrador de xestión de cargues flexibles instaláu nel llaboratoriu Xixón DemoLab de la Cátedra Milla de la Conocencia Xixón Smart Cities nel que tán implicaes distintes empreses ya instituciones.

 

Dambos proyectos d'investigación fueron impulsaos pol Dr. Adriano Mones (director de desenvolvimientu de negociu en Phoenix Contact Y-Mobility pa España y LATAM) y tán siendo empobinaos pol profesor del Departamentu d'Inxeniería Eléctrica, Investigador del grupu LEMUR y director de la Cátedra Smart Cities, Pablo Arboleya.

 

Pa enmarcar les investigaciones, hai de tenese en cuenta que l'ésitu énte los induldables retos que plantega'l cambéu de modelu escontra una economía baxa en carbonu ta por demás amestáu a la innovación y al desenvolvimientu tecnolóxicu que se producen nel ámbitu de la enerxía. 

Nel procesu de transición enerxética escontra un sistema enerxéticu sostenible, les midíes d'eficiencia y aforru complementar colos esfuerzos n'innovación tecnolóxica, empuestos, de la mesma, pola necesidá de producir de forma más sostenible, eficiente y a precios competitivos, amenorgar la dependencia esterior y lluchar contra'l cambéu climáticu.  

 

Les árees nes que se estructuran les principales llínees d'investigación nel ámbitu de les redes intelixentes son fundamentalmente l'almacenamientu y xeneración d'enerxía, el desenvolvimientu del vehículu eléctricu, según la distribución y el tresporte de la enerxía de forma eficiente. 

 

La distribución eléctrica ta esperimentando más cambeos nestos últimos años de los que se vivieron mientres décades gracies a les meyores nes llínees d'investigación mentaes. Delles tecnoloxíes como'l vehículu eléctricu, sistemes de xeneración fotovoltaicos, sistemes d'almacenamientu o bombes de calor fueron amenorgando los sos costos de manera esponencial pa faese más accesibles a los usuarios finales. 

 

Estes tecnoloxíes provoquen que lo qu'enantes yeren solu veceros que consumíen eletricidá, convirtiérense en prosumidores, veceros que producen eletricidá o la peracaben de forma flexible. Esto ye, que'l consumu y la xeneración distribuyida puedan xestionase de forma activa pa llograr una mayor eficiencia amenorgando les necesidaes d'inversión n'infraestructura eléctrica. 

 

Pa llograr una penetración masiva d'esti tipu d'enerxía fomentando la descarbonización al traviés de la electrificación ye necesariu disponer de sistemes de xestión de les cargues flexibles y diseñar mecanismos de mercáu que dexen la participación de los prosumidores y este ye l'oxetivu conxuntu de dambes investigaciones.