El nuevu Plan d'Igualdá de la Universidá d'Uviéu, que yá foi unviáu para'l rexistru, inclúi per primer vegada, una auditoría retributiva de la Universidá, ellaborada en collaboración cola directora d'estratexa económica de la Universidá, que va dexar avanzar na llucha contra la fienda de xéneru. El documentu, preparáu pel Área d'Igualdá del Vicerrectorado de Relaciones Institucionales y Coordinación, foi axustáu con tolos sindicatos con representación na Universidá d'Uviéu. Resultancia d'esa negociación ye'l testu final del Plan, alcordáu por unanimidá, col votu favorable de SIPU, CCOO, UXT, CSIF y CSI.

 

El plan, que puede consultase so estes llínees y n'igualdá.uniovi.es, contien hasta 95 midíes estructuradas en cinco bloques d'actuación: sensibilización na cultura d'igualdá; igualdá nel trabayu y conciliación; igualdá en docencia y estudiu, igualdá n'investigación ya igualdá n'órganos de gobiernu y representación. Toes estes midíes inclúin los correspondientes indicadores, responsables y plazu d'execución. El nuevu plan tien una vixencia prevista hasta 2025, anque con actualizaciones y revisiones añales de meyora.

 

De toles midíes incluyíes nel plan, destaquen aquelles más tresversales. Ye'l casu, por poner dellos exemplos, de les enfocaes na paridá y equilibriu de composición na constitución y accesu a comisiones, tribunales o órganos de selección y contratación, les empuestes a apurrir una redolada llibre d'acoso por razón de sexu, aquelles otres tendentes a favorecer la conciliación de la vida personal, familiar y llaboral o les empobinaes a embrivir los factores que xeneren la desigualdá retributiva de muyeres y homes.