"¿Qué sería'l to nome ensin ti?" Poesía y nome propiu n'Ángel González ye'l títulu de la conferencia que va pronunciar mañana jueves Verónica Leuci, profesora de la Universidá Nacional de Mar de la Plata, n'Arxentina. Leuci va disertar sobro'l papel de los nomes propios na obra poética del escritor uvieín y premio Príncipe d'Asturies de les Lletres en 1985. La charra forma parte del ciclu Llecciones de coses. Con Ángel González entamáu pola Cátedra Ángel González de la Universidá d'Uviéu cola collaboración de la Fundación Banco Sabadell y de la Conseyería de Cultura del Principáu d'Asturies.

"Los nomes propios representen xuna de les clases de palabres más complexes: les sos lletres zarren un misteriu y un halo enigmáticu,  cuantimás porque impliquen una fonderada acechante: el d'una presencia nel mundu", destaca la profesora arxentina. "Como indica Borges n'Hestoria de los ecos d'un nome, pal pensamientu máxicu, o primitivu, los nomes nun son símbolos arbitrarios sinón parte vital de lo que definen", añede. Na so conferencia, que va ser presentada pola profesora Araceli Iravedra, directora de la Cátedra Ángel González, Verónica Leuci propónse retomar esa conexón antigua qu'enllaza dos ordes diversos —palabres y vida— a la lluz d'una de les voces más importantes de la poesía española contemporanea: la d'Ángel González.

"Vamos Lleer la so obra poética siguiendo un exa curiosa que la percuerre dende los sos empiezos, en 1956, y hasta el póstumu llibru Nada grave, de 2008: la incorporación poética de nomes propios,  cuantimás el mesmu nome d'autor", destaca. "Esti encruz y vaivén suxerente ente vida y poesía tien como centro l'ambigüedá, cruciando provocativamente la lliteratura cola hestoria, y unviando dende los versos escontra la biografía y los suxetos de carne y güesu", sorraya.

Verónica Leuci ye profesora y doctora en Lletres pola Universidá Nacional de Mar de la Plata ya Investigadora del Conseyu Nacional d'Investigaciones Científica y Tecnolóxiques (CONICET) n'Arxentina. Trabaya como docente nesta universidá na Cátedra de Lliteratura y cultura españoles contemporanea, de la Facultá d'Humanidaes, na que dicta tamién seminarios de grau y posgrado. Forma parte dende l'añu 2005 del Grupu d'Investigación Semiótica del Discursu, dirixíu pola Dra. Laura Scarano, con proyectos d'investigación aniciaos nel Centru de Lletres Hispanoamericanes (Celehis) y el INHUS.

La profesora Verónica Leuci tien amás xuna abondosa producción dedicada prioritariamente a distintes temes y autores de la poesía española contemporanea, dende'l mediu sieglu hasta la poesía de les últimes décades. Ye tamién autora del llibru Poetes in-versos: ficción y nome propiu en Gloria Fuertes y Ángel González (Editorial Eduvim, 2019). Na actualidá, codirige na Universidá Nacional de Mar de la Plata un proyectu denomináu De los Salones a la Web: sociabilidá(ye), redes y campu lliterario n'España (sieglos XIX a XXI) (2019-2021) y, nel marcu de los sos proyectos d'investigación de CONICET, desenvuelve un plan dedicáu al estudiu de la autorrepresentación de les voces poétiques femenines na posguerra, como Gloria Fuertes, Ángela Figuera y Carmen Martín Gaite.