Conchi ye un asistente virtual, del estilu a los altavoces intelixentes que yá esisten nel mercáu, que podría ayudar a detectar problemes y sollertar sobro l'estáu cognitivu de les persones mayores que viven soles. La idea, premiada ayeri nel Uniovi Innovation Skills, surdió del trabayu d'un grupu de nueve estudiantes d'Inxeniería de Tecnoloxíes Industriales de la Universidá d'Uviéu, y respuende a un retu plantegáu pola empresa Izertis.

Alba González Fernández, una de les alumnes qu'integra esi grupu, esplica cómo funciona: "Conchi realizaría entrugues día ente día a les persones mayores que viven soles, o que tienen dalguna dependencia", diz, y añede que "son preguntes sobre cómo tán, si recibieron visites, si salieron a la cai, etcétera". El dispositivu intelixente recoyería les respuestes recibíes, y colles, realizaría una evaluación sobro l'estáu del usuariu. "Podría avisar al médicu o a la familia nel casu de que detecte daqué reseñable", añede González.

Amás, l'alumna d'Inxeniería de Tecnoloxíes Industriales esplica que "podríen implementase tamién xuegos mentales qu'ayuden a caltener un bon estáu cognitivu y, al igual qu'asocede coles respuestes, rexistrar les resultancies de los xuegos pa detectar si produz un deterioru". El grupu d'estudiantes, formáu por ocho alumnes y un alumnu, nun pensó entá en si va comercializase la so idea o non, pero señalen que "solo participar, pensar en cómo desenvolver la idea, el so preciu, cómo llanzala al mercáu, foi una esperiencia bien positiva". "Danos una perspectiva bien práctica de too lo que tamos estudiando", esplica Alba González. Al pie de ella, formaben l'equipu Ana García Fernández, Ana Álvarez López, Ane Jaureguizar López, Carlota Palacio Fernández, Elena Iturrate Van Basar, Mariana Echevarría Rodríguez, María Ferrero Medina, Jaime Rodríguez Gallego.

Uniovi Innovation Skills ye una plataforma de networking y generación d'idees ente empresa, universidá y talentu universitario. Con esti proyectu, los alumnos recibíen retos reales propuestos poles empreses participantes y teníen como oxetivu final contribuyir a compartir conocencia, ameyorar la competitividá empresarial y xenerar innovación. El proyectu, financiáu per Xixón Impulsa y entamáu pola Fundación Universidá d'Uviéu cuntó nesta edición con un total d'ocho retos plantegaos pol mesmu númberu d'empreses, de los que los alumnos escoyeron seis, y con siete grupos d'estudiantes participantes, nun total de 57 alumnos.

Amás del retu ganador, plantegáu pola empresa Izertis, presentáronse los siguientes retos:

Retu EDP: Peer to Peer Trading, Transactive Energy y Blockchain

Esti retu, plantegáu pola empresa EDP, pretendía buscar una solución qu'aprovechara la flexibilidá de les pequenes fontes enerxétiques dientro de les instalaciones de los veceros, según recursos que solliviaren conxestiones na rede de distribución. Dos grupos d'alumnos escoyeron esti retu, pertenecientes a les titulaciones de Comerciu y Marketing, Inxeniería Mecánica, Inxeniería Informática en Tecnoloxíes de la Información, Inxeniería Electrónica Industrial y Automática ya Inxeniería de Tecnoloxíes Industriales.

Retu Guppy: Plataforma de movilidá sostenible

El retu Guppy proponía diseñar un nuevu serviciu na plataforma de movilidá sostenible. El serviciu tenía de conectar a veceros con conductores y provisores de los servicios de movilidá. Participaron nel resolvimientu d'esti retu un equipu de 11 estudiantes de les titulaciones d'Inxeniería de Tecnoloxíes Industriales, Biotecnoloxía, Inxeniería Informática, Derechu y Alministración y Dirección d'Empreses, Alministración y Dirección d'Empreses Billingüe y Comerciu y Marketing.

Retu Triditive: Revalorización de borrafes de la ellaboración de sidra pa impresión 3D.

Nesti retu trabayó un equipu formáu por 10 estudiantes del Grau n'Inxeniería de Tecnoloxíes Industriales, Máster Erasmus Mundus en Tresporte Sostenible y Sistemes de Potencia Eléctrica y Ciencies Empresariales. L'equipu tenía d'analizar y proponer innovaciones sobro cómo podríen revalorizase les borrafes producíes na ellaboración de la sidra pal so aprovechamientu na impresión en 3D.

Retu Neoalgae: Imaxine Marketing

Nesti retu trabayó un equipu formáu por 10 estudiantes que cursen estudios de Ciencies Empresariales. El retu consistía en diseñar una campaña de marketing basada en métodos de comunicación innovadores pal llanzamientu d'una nueva llínea de cosmética natural certificada.

L'actu virtual de presentación de los trabayos y de la proclamación del equipu ganador tuvo llugar ayeri, 22 d'abril, y nél tuvieron presente Susana Menéndez Requejo, vicerrectora de Tresferencia y Relaciones cola Empresa de la Universidá d'Uviéu, y Santos Tejón Llanez, conceyal de Promoción Económica, Empléu, Turismu y Comerciu Local nel Conceyu de Xixón. El xuráu taba compuestu por ellos dos al pie de Juan Carlos Campo Rodríguez, director Escuela Politécnica d'Inxeniería de Xixón; Levi Pérez Carcedo, decanu Facultá de Comerciu, Turismu y Ciencies Sociales Xovellanos: Pablo Roza Miguel, de MBA Surgical Empowerment y Susana Pascual Madrigal, de Pixelshub.