El Conseyu de Gobiernu de la Universidá d'Uviéu aprobó güei en xunta estraordinaria la so ufierta académica de nuevu ingresu para'l cursu 2021-2022 tantu para los estudios de Grau como de Máster. La ufierta formativa de la institución docente para alumnos de nuevu ingresu va sumar el próximu cursu académicu 6.672 places (4.873 para los Graos, incluyíes les 50 de Ciencia ya Inxeniería de Datos, pindiu d'aprobación, y 1.799 para los másteres). La ufierta global de titulaciones va ser de 120 estudios (60 Graos y 60 Másteres, incluyíos seis Erasmus Mundus, cuatro d'ellos coordinaos pola Universidá asturiana).

 

Esti primer Conseyu de Gobiernu estraordinariu presidíu pol nuevu rector Ignacio Villaverde aprobó tamién procedimientu y plazos d'inscripción y matrícula para los másteres universitarios del próximu cursu. El calendariu establez que'l plazu de preinscripción va dir dende'l 1 d'abril al 10 de xunu del 2021 y la matrícula tendrá de formalizase ente'l 4 d'agostu y el 7 de setiembre del 2021.

 

El plenu del Conseyu dio tamién lluz verde a les comisiones de selección de places de cuerpos docentes universitarios con plaza asistencial venceyada; de places de personal docente ya investigador na figura de profesor contratáu doctor I3; y de places de cuerpos docentes universitarios de profesor titular I3. Con esta decisión, la Universidá d'Uviéu va tar en disposición de recibir les ayudes del Ministeriu d'Universidaes pa llograr la estabilización del personal investigador.

 

Otros alcuerdos

El máximu órganu de Gobiernu de la Universidá dio de la mesma el vistu bonu por que la Xunta Electoral Central adopte les midíes necesaries pa garantizar los procesos electorales pindios como la selección de representantes de centros y departamentos y de representantes estudiantiles. A lo último, alcordó designar al vicerrector de Relaciones Institucionales y Coordinación, Humberto Rodríguez Solla, como representante del personal docente ya investigador de la Universidá d'Uviéu nel Conseyu Social.