Marta González García, profesora del Departamentu de Filosofía de la Universidá d'Uviéu, impartió ayeri la conferencia "Les muyeres na ciencia y la ciencia nel feminismu", dientro de la iniciativa YoSoyCientífica y de "100CIA en Extensió___n. Ciclo Mujer y Ciencia". Na so intervención, que se celebró de manera telemática, la profesora afirmó que "l'ausencia o presencia de muyeres tien consecuencies nes teoríes y tecnoloxíes que se producen". González García amosó dellos exemplos de la relación ente la cuestión de les muyeres na ciencia y de la ciencia nel feminismu, defendiendo que "la ciencia puede reflexar estereotipos y preconcepciones culturales de xéneru, coles mesmes que constitúi un preséu esencial pa la so identificación y corrección". 

 

L'actu tuvo presidíu pol rector, Ignacio Villaverde, que lleó'l manifiestu de Crue pel Día Internacional de la Muyer. El documentu menta, ente otres coses, que "incorporar la perspectiva de les muyeres y de xéneru ye, dende fai más d'una década, una obligación llegal. Pero pa la Universidá ye, amás, una obligación moral. Tenemos la responsabilidá de ser el motor de tresformamientu social al traviés de la formación, la investigación y la concienciación".

 

El programa conmemorativo del Día Internacional de la Muyer y la Neña na Ciencia na Universidá d'Uviéu cunta cola collaboración del Ministeriu Ciencia ya Innovación y la Fundación Española pa la Ciencia y la Tecnoloxía (FECYT).