La Universidá d'Uviéu lidera'l proyectu LIFE, nel que tamién collaboren la Universidá Politécnica de Cartaxena y la Internacional de La Rioxa. Los fondos proceden del Fondu Supera Covid 19, nel marcu de los 30 millones d'euros que la entidá movilizó del so mecenalgu n'educación pa sofitar proyectos que faigan frente al virus y les sos consecuencies
Desenvolver un dispositivu portátil y de baxu costu que detecte'l SARS-CoV-2 en minutos y seya igual de fiable qu'una PCR. Este ye l'oxetivu del equipu multidisciplinar que trabaya nestos momentos nel proyectu LIFE, lideráu pola investigadora María Teresa Fernández Abedul, de la Universidá d'Uviéu. Ye una investigación que foi escoyida pol Fondu Supera Covid 19, ente 700 presentaes en toa España y al que se destinaron 140.000 euros.
Según la investigadora María Teresa Fernández Abeduriu, esti proyectu multidisciplinar, nel que se xunieron les disciplines de Química Analítica, Microbioloxía ya Inxeniería Telemática supón "una meyora bien importante nel diagnósticu d'enfermedaes infeicioses gracies al desenvolvimientu d'una plataforma integraada y cenciella, que permitar caltener una temperatura estable mientres el tiempu d'amplificación del material xenéticu del patóxenu, ensin ser necesaria la realización de ciclos de temperatura. La combinación con un potenciostatu miniaturizáu permite llograr una señal instrumental d'un indicador presente na disolución d'amplificación, que puede rellacionase cola carga viral presente".
Trabayu n'equipu
El proyectu LIFE tamién cunta cola participación de la Universidá Politécnica de Cartaxena y la Universidá Internacional de la Rioxa. El dispositivu va utilizar la técnica LAMP (Loop-mediated isothermal amplification o amplificación isotérmica mediada por bucle) pa detectar y cuantificar la carga viral de les persones afectaes pola pandemia de coronavirus al traviés d'una amuesa de exudáu nasofarínxeu. Les previsiones indiquen que podría tar llistu pa la seronda del añu que vien, siendo'l plazu d'execución del proyectu de 12 meses.
El Fondu Supera Covid 19, promovíu pol Banco Santander al traviés de Santander Universidaes, en collaboración con Crue Universidaes Españoles y el CSIC, sofita proyectos impulsaos poles instituciones académiques sobro trés exes clave: investigación aplicada sobre'l virus y la so prevención, a los que se destinaron 5 millones d'euros; estudios d'impactu social, dotaos con un millón d'euros y fortalecimientu de la capacidá tecnolóxica de les universidaes y amenorgamientu de la fienda dixital, exa financiada con 2,5 millones.
