El Conseyu de Gobiernu de la Universidá d'Uviéu aprobó esta mañana la convocatoria de places de profesoráu con cargu a la Ufierta Pública d'Empléu del añu 2019 para la institución académica a les que va poder optar el Personal Docente ya Investigador de la Universidá. La convocatoria algama prácticamente'l centenar de places: un total de 38 de catedráticu o caderalga, 41 de profesoráu titular y 20 de profesoráu contratáu doctor per vez llibre. 

 

No que se refier a les mentaes 38 places de catedráticu o catedrática d'Universidá, 31 d'elles son por promoción interna, una por vez de discapacidá, una para candidatos o candidates que tengan plaza venceyada al Serviciu de Salú del Principáu d'Asturies. Coles mesmes convóquense cinco places de vez llibre para candidatos o candidates que fueren contrataos con cargu a programes d'excelencia y cunten con acreditación I3. 

 

Pela so parte, de les 41 places de profesoráu titular, trés d'elles acútense para candidatos o candidates que fueren contrataos con cargu a programes d'excelencia y cunten con acreditación I3, y dos para quien tengan plaza venceyada al Serviciu de Salú del Principáu d'Asturies.

 

Posibilidá de presentación de solicitúes telemátiques

 

Na xunta del órganu universitariu, presidida pol rector, Santiago García Granda, y desenvuelta online, aprobóse coles mesmes la propuesta de cambéu del Reglamentu para provisión de places de cuerpos docentes universitarios, con cuenta de les solicitúes puedan presentase al traviés de medios telemáticos, por aciu l'aplicación informática que se disponga al efeuto.

 

Elecciones al Rectoráu 

 

Per otru llau, tal que  recueye l'artículu 17 del Reglamentu d'elección del Rector, na xunta comunicóse al Conseyu de Gobiernu'l calendariu de les elecciones rectorales de la Universidá d'Uviéu, que se van celebrar el próximu 1 d'avientu. 

 

Para llindar el costu económico y ecolóxico de la documentación xenerada en papel nel procesu electoral, particularmente la relativa a los censos, lo mesmo que de facilitar el desenvolvimientu de les sos distintes fases, los actos de comunicación y publicidá de les elecciones van realizase al traviés de la páxina web y del corréu electrónicu institucionales.

 

Informe d'execución presupuestaria del tercer trimestre 

 

El Conseyu de Gobiernu tamién aprobó la execución presupuestaria de la institución académica correspondiente al tercer trimestre, que s'asitia nel 60,63 %. En xunto, la execución acumulada a 30 de setiembre algama los 128.363.577,83 euros, ente que s'atopen en trámite procedimiento alministrativos de gastu por un importe superior a los 142 millones d'euros.

 

Respectu al gastu directamente rellacionáu colos efectos de la COVID-19 que pudo ser contabilizáu hasta'l momentu, xube a 2,8 millones d'euros. Esta cifra entá nun ye definitiva, cuidao que falta por añedir los gastos que tán llevando a cabu directamente los centros y departamentos, que la so evaluación tar realizando nestos momentos.  

 

Nuevu profesor eméritu 

 

Per otru llau, el Conseyu de Gobiernu aprobó'l nomamientu de Pedro M. Sánchez Llazu como profesor eméritu. Ente otros asuntos, el Conseyu de Gobiernu tamién aprobó la primera asignación de la collaboración docente pal presente curso, con 126 places, y cambeos en titulaciones de grau, máster y doctoráu.