El programa d'actividaes divulgatives y artístiques, denomináu enCOHENtros, va desarrollase del 17 d'ochobre al 13 d'avientu nel Edificiu Hestóricu y nel Teatru Filarmónica (Uviéu). Inclúi conciertos d'homenaxe a Luis Eduardo Aute y a Cohen y una esposición-instalación sobre'l cantautor canadiense
La Cátedra Leonard Cohen de la Universidá de Uviéu y la Fundación Municipal de Cultura del Conceyu d'Uviéu van desenvolver del 17 d'ochobre al 13 d'avientu, nel Edificiu Hestóricu y nel Teatru Filarmónica, la 1er Temporada del cantar d'autor, sol títulu d'enCOHENtros. El programa va incluyir un homenaxe a Luis Eduardo Aute (conciertu-proyección); un Cohenciertu nel que cantautores d'Asturies van interpretar les sos versiones de Leonard Cohen y un homenaxe flamencu al canadiense; una instalación-esposición (Cohenversaciones), una radio-cohenferencia -charra con un formatu asemeyáu a un programa de radio- y na conferencia y recital poéticu-musical sobre Federico García Lorca y Cohen. El programa ta entamáu pola institución académica asturiana y el consistoriu uvieín en collaboración cola Fundación Princesa d'Asturies, la Fundación Banco Sabadell, Fundación Cajastur-Liberbank y SACU (www.semanasaco.com).
Los enCOHENtros tienen como oxetivu analizar y esfrutar de la guapura de los cantares y les sos formes con Leonard Cohen como exa vertebrador. Ye un conxuntu d'actividaes académiques y artístiques pensáu pa ser esfrutáu tantu pol públicu xeneral, como por estudiosos del cantar d'autor.
Por cuenta de la situación provocada pola COVID-19, la Cátedra Leonard Cohen y la Fundación Municipal de Cultura tuvieron que suspender los enCOHENtros programaos primeramente pa los meses de marzu y abril, qu'agora se retomen sumando l'homenaxe a Aute y la radio-cohenferencia. Pela so parte, el congresu (cohengreso) que taba previstu pa marzu, denomináu Primíos poles formes de la guapura, tuvo que quedar pa una meyor ocasión en qu'estudiosos y estudioses y el públicu puedan participar cola cercanía personal qu'arriquez un eventu como este.
L'absolutamente necesariu amenorgamientu de los aforos va ser parcialmente arreglada cola tresmisión por redes sociales de dalgunos de los eventos, y la posibilidá de que les y los non asistentes tamién participen con entrugues o comentarios al traviés d'esti mediu. Más información sobro los enCOHENtros en http://www.unioviedo.es/leonardcohen/
PROGRAMA
17 d'ochobre: Primer Cohenciertu de canción d'autor n'Asturies
20 hores
Llugar: Teatru Filarmónica, accesu llibre previa retirada d'entraes en https://entradas.oviedo.es
El Cohencierto axunta a cantautores d'Asturies nel Teatru Filarmónica d'Uviéu/Uviéu para presentar delles de los sos cantares y versiones de Leonard Cohen. Nél participen músicos con una trayectoria amplia y consolidada, pero tamién artistes que tán empezando la so carrera profesional nel campu del cantar d'autor. Les y los collaboradores son Pablo Moro, Igor Paskual, Pablo und Destruktion, Héctor Tuya, Delagua, Toli Morilla y Cristina Gestido. L'oxetivu ye qu'elles y ellos mesmos y los sos cantares se re-conozan.
Esti Cohenciertu forma parte d'un proyectu de más llargu algame: quier ser el primeru de munchos alcuentros ente músicos que trabayen el cantar d'autor n'Asturies, creando sinerxes y trabayos en collaboración, y tamién contactos con autores y festivales d'otres rexones españoles.
24 d'ochobre: Homenaxe a Luis Eduardo Aute (conciertu-proyección). Collaboración con SACO.
12 hores, sesión vermú
Llugar: Teatru Filarmónica, accesu llibre previa retirada d'entraes en https://entradas.oviedo.es
En collaboración con SACO (http://www.semanasaco.com/) va celebrase un pequeñu homenaxe al inmortal Aute al traviés d'un pequeñu conciertu previu onde Mapi Quintana y Carlos Pizarro van interpretar versiones de canciones del cantautor, y va proyectase la película Aute Retrato nominada a los premios Goya (2020), de Gaizka Urresti.
13 de payares: Flamencohen: Homenaxe flamencu a Leonard Cohen.
20 hores
Llugar: Teatru Filarmónica, accesu llibre previa retirada d'entraes en https://entradas.oviedo.es
"Flamencohen" ye una producción empobinada por Alberto Pumar, biógrafu del poeta-cantante canadiense Leonard Cohen y traductor de la so obra lliterario y discográfico en castellán, nun conciertu que-y rinde tributu, pero, coles mesmes, quier ser un homenaxe a tolos artistes flamencos que grabaron versiones del cantante del fueu sagrao": Enrique Morente, Mayte Martín, Duquende, Argentina, Son de la Frontera, Pasión Vega, Silvia Pérez Cruz, Sandra Carrasco y Rocío Segura.
Porque'l flamencu foi la gran devoción musical de Leonard Cohen, ye hora de que la escelencia llírica del ‘poeta sagráu del rock' seya realzada na máxima espresión, pasión y fondura que-y otorga esti xéneru musical.
Del 10 al 13 d'avientu: Instalación-esposición, Cohenversaciones, n'horariu d'apertura del Edificiu Hestóricu de la Universidá d'Uviéu.
Capiella de la Universidá Actu inaugural, 10 d'avientu a les 19 hores, con Jordi Turtós (periodista de prensa escrita y radio, investigador, programador cultural).
Entrada llibre hasta completar l'aforu.
A les 19:30 hores: radio-cohenferencia de Jordi Turtós: "Un páxaru nel alambre: El conceptu cantautor y la so evolución nos medios de comunicación" (conferencia tresmitida per RRSS con soporte musical y abiertu a entrugues dende la sala y dende RRSS)
Entrada llibre hasta completar l'aforu Instalación-esposición, Cohenversaciones, na Capiella de la Universidá d'Uviéu, con material audiovisual que se va esibir sobro Leonard Cohen n'España y, amás, del so viaxe a Asturies en 2011, cuando recibe'l Premiu Príncipe d'Asturies de les Lletres cola resultancia de la fundación de la Cátedra que lleva'l so nome.
11 d'avientu: Cohenferencia y Un viaxe de dir: recital poéticu-musical sobre Lorca y Cohen.
19:30 hores
Lugar: Paraninfu de la Universidá d'Uviéu
La Cátedra Leonard Cohen entama esti actu sobre la rellación entre Cohen y Lorca al traviés d'una curtia conferencia ufiertada pol caderalgu de la Universidá de Salamanca Javier San José tituláu "Onde xueguen la to boca y los ecos. Lorca y Cohen. A thousand reviews", y un recital poéticu-musical realizáu por una agrupación zamorana. Esti recital, Un viaxe solu d'ida, ye interpretáu por Edu Jerez y José Miguel Arias y afonda nos llazos y vínculos ente la obra de Federico García Lorca y Leonard Cohen. Nesti viaxe repasen los paralelismos ente la obra y la vida de los dos artistes y la importancia de los sos respectivos viaxes a Nueva York y Granada por aciu la declamación y llectura de poemes de dambos autores, y de la interpretación de cantares de Cohen. Conferencia tresmitida per RRSS.
