La IV edición de la Cátedra de Cultura Iberoamericana y Deporte tuvo como protagonista al exfutbolista y exseleccionador Vicente de Bosque, que dirixó la so charra a una comparancia ente'l manexu d'un vestuariu y el manexu de grupos humanos en cualesquier otru ámbitu, faciendo gala de los valor que lu caracterizaron como entrenador y seleccionador nacional: saber escuchar, ser quien a rectificar y caltener un nivel altu d'esixencia. Destacó, fundamentalmente, la so etapa como entrenador "formador", más que la profesional. Pa Del Bosque, "Un bon entrenador inflúi positivamente nel so equipu, tien credibilidá y ye esixente".

L'actu, celebráu na Aula Magna del Edificiu Hestóricu, tuvo presidíu pol vicerrector d'Estensión Universitaria y Proyección Internacional, Francisco José Borge López, acompañáu de la vicepresidenta de l'Asociación Iberoamericana de la Comunicación (ASICOM), Laura Galguera García. Francisco Borge destacó que si Del Bosque fuera escoyíu pa esta edición de la Cátedra nun la foi tanto polos trunfos qu'enllenaron la so trayectoria como futbolista y entrenador profesional, sinón polos valor que fuera capaz de tresmitir a tola sociedá española al traviés d'esti trabayu". Tomando'l testigu de la intervención de Del Bosque, el Vicerrector comparó "el rol d'entrenador formativu col nuesu, na Universidá, como profesores".

Vicente del Bosque llogró como seleccionador d'España'l Mundial de 2010 y l'Eurocopa de 2012. Na so etapa como futbolista del Real Madrid ganó 5 Lligues y 4 Copes d'España, y como futbolista, nel equipu blancu, dos Copes d'Europa, una Copa Intercontinental, una Supercopa d'Europa, dos Lligues y una Supercopa d'España.