El viaxe colectivu experiencial CHAMP-U 2020, unu de los gallardones del Concursu Universitariu de Talentu y Emprendimientu, CHAMP-U, de la Universidá d'Uviéu, tuvo como destín Galicia y el norte de Portugal. Les y los participantes, acompañaos del director d'Área de Cooperación cola Empresa y Empleabilidá de la Universidá, Enrique Covián, visitaron el primer día'l Muséu Científicu del Conceyu d'A Coruña y participaron nun taller creativu de testiles lletrónicos, en compañía de Benigno Antonio Rodríguez Gómez, profesor titular del Departamentu d'Inxeniería Industrial de la Universidade da Coruña.

 

L'axenda tuvo completa'l segundu día, con visites al Planetariu de la Casa de les Ciencies (Parque de Santa Margarita, A Coruña), un viaxe pel espaciu y el tiempu deprendiendo a reparar el cielu, al Muséu Nacional de Ciencia y Tecnoloxía (MUNCYT), al muséu MEGA ESTRELLA DE GALICIA -con un taller de preba de cerveza-, a la Cidade da Cultura (GAIAS, Santiago de Compostela) con recepción y charra d'emprendimientu creativu de la vicepresidenta de l'Asociación de Mozos Empresarios de Santiago de Compostela, Beatriz García Cibreiro, y, a lo último, un alcuentru nel llar central de la cooperativa MARTÍN CÓDAX (Cambados, Pontevedra) con preba, visita a fábrica y charra del director xeneral de la cooperativa, Juan Vázquez Gancedo.

 

Pela so parte, el tercer día celebróse una visita turística empuesta a Vigo empobinada a la identificación de los principales sectores granibles de la ciudá y la so redolada, amás d'un alcuentru con Belén Varela Romero, esperta de Dirección Estratéxica y de Persones y expresidenta d'AEDIPE (Asociación Española de Dirección y Desenvolvimientu de Persones).

 

El cuartu y últimu día tuvo llugar una visita al Institutu Cimeru d'Inxeniería de Porto, con especial atención al Llaboratoriu de Sistemes Autónomos "LSA" (Porto), acompañada pol pro-presidente del Institutu Politécnicu de Porto (Porto), Paulo Tomás do Santos, y otra visita a WOW (World of Wine Porto) p'afayar les sos esperiencies y los sos secretos.

 

El viaxe tuvo financiáu pol Gobiernu del Principáu d'Asturies. El concursu CHAMP-U cuenta amás cola collaboración de la Fundación Banco Sabadell, Thyssenkrupp y l'Asociación Asturias Emprende.