El llar del Institutu Universitariu de la Empresa (IUDE), la Escuela de Negocios de la Universidá d'Uviéu, foi escenariu del actu d'entrega de les Ayudes de matrícula de la Cátedra de Crecimientu ya Internacionalización Empresarial a cinco estudiantes del programa MBA Executivu del IUDE. L'actu cuntó cola presencia del director d'Área de Cooperación cola Empresa y Empleabilidá de la Universidá d'Uviéu, Enrique Covián Regales; del director de la Cátedra y director del IUDE, Esteban García Canal, y d'Alfredo Fernández Santos, director comercial de la Delegación Territorial Noroeste del Banco Sabadell, en representación de la Fundación Banco Sabadell.

Enrique Covián estimó a la Fundación Banco Sabadell el so compromisu coles cátedres universitaries, pues anguaño ta sofitando trés d'elles na Universidá d'Uviéu: Crecimientu ya Internacionalización Empresarial, Leonard Cohen y Ángel González.

Pela so parte, Esteban García Canal manifestó que les Ayudes permiten tantu a la Cátedra como al IUDE cumplir colos sos oxetivos de formar a profesionales que seyan quien a da-yos puxu a proyectos de crecimientu empresarial n'Asturies, polo que manifestó'l so agradecimientu a la Fundación Banco Sabadell pola so arrogante aportación a la Cátedra.

 El representante de la Fundación Banco Sabadell repitió'l compromisu de la Fundación cola Universidá d'Uviéu, non solo al traviés de les cátedres, sinón tamién al traviés del programa de práctiques que lleva más de 20 años a valir. Coles mesmes, dada la coxuntura actual, animó a les y los estudiantes del MBA a poner en práctica les sos capacidaes de xestión de la incertidume y a tratar d'aprovechar les ventayes de territoriu qu'esisten n'Asturies.

 Sobre la Cátedra de Crecimientu ya Internacionalización Empresarial

 La Cátedra de Crecimintu Empresarial ya Internacionalización Empresarial xurde de la collaboración ente la Universidá d'Uviéu y la Fundación Banco Sabadell cola cuenta de promover la formación, divulgación ya investigación nesti campu nel Principáu. Partir del convencimiento de que, tan importante como que se creen nueves empreses, ye que los proyectos nuevos tengan potencial de crecimientu, pues cuntar con empreses grandes y en crecimientu ye lo que contribúi al despegue d'una rexón.

 La Cátedra ta venceyada al Grupu d'Estratexes de Crecimientu ya Internacionalización Empresarial (GESCRINTER), grupu d'investigación reconocíu pola Universidá d'Uviéu y qu'esiste como tal dende fai 25 años; magar la Cátedra foi creada nel añu 2018. Los sos miembros son Esteban García Canal, caderalgu d'Organización d'Empreses, como director, y un equipu de profesoráu collaborador formáu por Ana Valdés Llaneza, Andrea Martínez Noya, Pablo Sánchez Lorda, y Raquel García-García, pertenecientes a la área Organización d'Empreses na Universidá. Les actividaes de formación de la Cátedra tán venceyaes al IUDE, la Escuela de Negocios de la Universidá d'Uviéu, pero les de divulgación tán abiertes a tolos centros y ámbitos d'actuación de la Universidá, amás d'a la collaboración con empreses ya instituciones.