Les clases del Programa pa Mayores de la Universidá d'Uviéu (PUMUU) del cursu 2020-2021 dieron empiezu ayeri nes sos cinco sedes: Uviéu, Xixón, Avilés, Mieres y, per primer vegada nesti cursu, en L.luarca. Al primer día de clas nesta sede, nel Edificiu Severo Ochoa del IES Carmen y Severo Ochoa, asistieron el vicerrector d'Estensión Universitaria y Proyección Internacional, Francisco José Borge López; l'alcalde de Valdés, Óscar Pérez Suárez; la directora d'Área de Formación Continua y PUMUU de la Universidá, Ángeles Fernández; el director del IES onde se desenvuelven les actividaes de PUMUO, José Ignacio Nieto García; y el conceyal de Cultura, Ismael González Suárez.

 

Na so intervención, el Vicerrector destacó "la importancia del PUMUU como elementu vertebrador de la rexón al traviés de la nuesa Estensión Universitaria, amás del so valor tantu dende'l puntu de vista académicu como social, favoreciendo'l deprendizaxe a lo llargo de la vida y fomentando venceyos indisolubles ente los sos miembros". Coles mesmes, el Vicerrector sorrayó "el siguíu ya imprescindible sofitu de la Fundación Caja Rural de Asturias, ensin que'l so concursu esti programa nun podría esistir".

 

Pela so parte, l'alcalde de Valdés, Óscar Pérez Suárez, espresó'l so prestu al poder cuntar con actividá permanente de la Universidá nel conceyu, y señaló qu'espera qu'esta collaboración siga n'aumentu.

PUMUU creció dende los 385 estudiantes nel 2016 hasta los casi 860 el cursu pasáu. Esti cursu, magar la pandemia, yá s'algamaron les 466 matrícules.

 

El Programa pa Mayores de la Universidá d'Uviéu cunta col patrociniu de la Fundación Caja Rural, el Conceyu de Xixón, el Conceyu de Mieres, el Conceyu de Valdés y la collaboración del Conceyu d'Avilés.