La Fundación Siloé foi la entidá galardonada col Premiu "Ana Casanueva" 2020, que consiste nun premiu únicu de 50.000 euros. La decisión del xuráu, conformáu pol rector de la Universidá d'Uviéu, Santiago García Granda; Alberto Aza Arias, conseyeru Permanente d'Estáu; Carlos Fernández Collada, presidente de l'Asociación Iberoamericana de la Comunicación; José Luis García Delgado, ex rector de la Universidá Menéndez Pelayo; y Rosa María Menéndez, presidenta del CSIC, foi comunicada a los medios de comunicación esta tarde nel Hotel de Reconquistas (Uviéu) por Santiago González-Alverú Nieto, quien actuó como secretariu.

 

El Premiu "Ana Casanueva", convocáu pol empresariu y filántropu ástur-mexicanu Carlos Casanueva Vares y l'Asociación Iberoamericana de la Comunicación (ASICOM) en collaboración cola Universidá d'Uviéu, tien como oxetivu reconocer el trabayu d'organizaciones non gubernamentales, instituciones d'asistencia privada, fundaciones, asociaciones civiles y organismos ensin fines d'arriquecimientu que cunten con una trayectoria d'a lo menos cinco años a partir de la constitución llegal de la organización y qu'operen nel Principáu d'Asturies, con un premiu únicu de 50 mil euros p'aquelles que tengan proyectos fueren los más destacaos mientres l'añu 2019 en temes d'impactu social n'Asturies. 

 

Les exes temátiques pa otorgar el premiu son: atención y sofitu a población en condiciones de desventaya, esclusión social o probeza; xeneración d'oportunidaes y accesu a educación y formación; accesu a servicios sociales y de salú; sofitu a migrantes, y trabayu con grupos vulnerables o en riesgu.

 

La Fundación Siloé entamó la so trayectoria nel añu 1989, nel Centru Penitenciariu «El Coto», en Xixón, dende'l trabayu social del equipu pastoral y voluntariáu cristianu de prisiones. Tien como bases fundamentales l'atención de persones en situación de vulnerabilidá, especialmente menores y nueves en situación de riesgu social, persones con discapacidá intelectual, persones afectaes por VIH o SIDA y con patoloxíes clíniques que precisen curiaos especiales, persones con problemes de drogodependencias y aquelles afectaes por trestornos mentales.