La Universidá d'Uviéu y SERESCO creen la Cátedra SERESCO de Modelos Nuevos de Negociu
L'oxetivu principal ye incrementar la tresferencia de conocencia y softiar el procesu d'acreitación internacional de la Facultá d'Economía y Empresa énte l'Association to Advance Collegiate Schools of Business (AACBS). Centraráse na tresformación dixital de los negocios y contará col softu de la multinacional Sage, líder en sistemes de xestión empresarial
El rector de la Universidá d'Uviéu, Santiago García Granda, y el director xeneral de SERESCO, Manuel Ángel Busto Riego, roblaron esta mañana'l conveniu pol que se crea la Cátedra SERESCO de Modelos Nuevos de Negociu basaos en Tecnoloxíes de la Información. Ye la tercera de les seis cátedres que tien previstes la Facultá d'Economía y Empresa pa sofitar el financiamientu del so procesu d'acreitación internacional énte l'Association to Advance Collegiate Schools of Business (AACBS).
La nueva cátedra naz cola vocación de facer medrar la tresferencia de conocencia, ameyorar la empleabilidá del estudiantáu universitario, dinamizar la economía asturiana y desenvolver los medios tecnolóxicos de la Universidá, especialmente na Facultá d'Economía y Empresa. Pa ello prevé la realización d'actividaes de formación y empleabilidá, l'usu de máquines virtuales con accesu a X3 y XRT (productos líderes de la multinacional SAGE) pa la cualificación del estudiantáu, amás de la puesta a disposición de la comunidá universitaria'l software propiu de SERESCO basáu en Cloud Computing.
A la firma d'alcuerdu, que tien una vixencia inicial de cuatro años y una dotación de 5.000 euros añales, asistieron el director de l'Área de Tresformamientu Dixital de SERESCO, Alejandro Blanco Urizar; la decana de la Facultá d'Economía y Empresa, Carmen Benavides González; el director de la cátedra Pablo Sánchez Lorda; el delegáu pa l'Acreditación Internacional, Isidro Sánchez Álvarez y la secretaria académica, María José García Salgado.
SERESCO ye una compañía creada n'Asturies fai 51 años, con presencia internacional, na redolada de los 700 emplegaos y con actividá nel campu de la xestión empresarial, los recursos humanos, la seguridá de la información y el tresformamientu dixital. Pela so parte, la británica Sage ye la segunda mayor empresa tecnolóxica del Reinu Xuníu y el tercer provisor de software de planificación de recursos empresariales a nivel mundial. Cuenta anguaño con más de 13.000 emplegaos qu'empresten serviciu a millones d'empreses en 23 países.
Galería d'imaxes
