Un proyectu pa predicir el riesgu d'apaición de diabetes nel embaranzu ábrese a la busca de financiamientu por micromecenalgu. La iniciativa "Precipita", de la Fundación Española pa la Ciencia y la Tecnoloxía (FECYT) (Ministeriu de Ciencia y Anovación), dexa collaborar por aciu donaciones con personal investigador de la Universidá d'Uviéu pa que desenvuelva y valide una ferramienta de predicción, basada en marcadores epixenéticos y en variables d'estilu de vida (alimentación, actividá física), por aciu del usu de técniques d'intelixencia artificial. D'esta miente, podrán introducise cambeos nel estilu de vida lo enantes posible y protexer tanto a la ma como al fetu.

 

La diabetes xestacional, qu'afecta al 7-15 % de los embaranzos, caracterízase por niveles altos de glucosa en sangre mientres l'embaranzu en muyeres primeramente sanes, que puede traer entueyos metabólicos importantes pa la ma y pal ñácaru o la ñácara, tantu a curtiu como al llargu plazu. 

 

Na actualidá, el diagnósticu d'esta enfermedá faise ente les selmanes 24 y 28 d'embaranzu, cuando la patoloxía yá ta establecida, y los tratamientos o'l cambéu del estilu de vida llévase a cabu nes etapes avanzaes de la enfermedá. Por ello, ye necesaria una identificación temprana o precoz del riesgu de diabetes xestacional, que dexe actuar lo enantes posible sobre l'estilu de vida (alimentación, actividá física), coles mires de frenar la progresión de la enfermedá y embrivir les consecuencies adverses pa la madre y pal fetu.

 

En particular, les madres tienen un mayor riesgu de desenvolver diabetes tipu 2 nos años posteriores al embaranzu, mientres que les y los naciellos tienen más probabilidaes de sufrir entueyos como un pesu escesivu al nacer o ser prematuros, amás d'un mayor riesgu d'obesidá y resistencia a la insulina n'años posteriores. Ente los factores de riesgu que predisponen al desenvolvimientu de diabetes xestacional tienen especial relevancia los rellacionaos col estilu de vida, sobre manera'l sedentarismu y una mala alimentación.

 

Los marcadores epixenéticos nos que se va centrar l'equipu investigador son los llamaos microRNA, qu'apaecen circulantes en sangre y que son compartíos pola madre y pol fetu al traviés de la barrera hematoplacentaria. Estos marcadores tienen un gran valor pa la predicción temprana del riesgu de diabetes xestacional, yá que se modifiquen sistemáticamente nes muyeres que darréu desenvuelven diabetes xestacional primero que los cambeos clínicos nos niveles de glucosa en sangre puedan detectase. 

 

L'oxetivu mínimu son 5000 euros y l'óptimu son 30 000 euros. Cola cantidá mínima pretenden sufragase gastos de material funxible, principalmente reactivos de llaboratoriu pa poder entamar a realizar los esperimentos pal estudiu de microRNA circulantes n'amueses sanguínies recoyíes mientres el siguimientu rutinariu del so embaranzu. Si se consigue algamar la cantidá óptima, amás el dineru va invertise na contratación d'un investigador o investigadora mientres un añu a tiempu completu pa que se dedique n'esclusividá a esti proyectu d'investigación. 

 

Esta propuesta surde del Grupu d'Investigación "Intervenciones Tresllacionales pa la Salú" (ITS) de la Universidá d'Uviéu, integráu nel Institutu d'Investigación Sanitaria del Principáu d'Asturies (ISPA). El Grupu promueve y coordina la Rede d'Investigación en Ciencies del Deporte "In motu salus", sol amparu del Conseyu Cimeru de Deportes, qu'integra a los grupos d'investigación nel estudiu de la respuesta fisiolóxica y molecular del exerciciu más importantes del país.

 

Esti proyectu va llevase a cabu en collaboración col Serviciu de Xinecoloxía y Obstetricia y el Serviciu d'Endocrinoloxía y Nutrición del Hospital Universitariu Central d'Asturies (HUCA), lo que va permitir facer l'estudiu con muyeres que faigan el siguimientu del so embaranzu nesti hospital.