El rector de la Universidá d'Uviéu, Santiago García Granda, y el conseyeru delegáu de R3 PWM Axencia de Valores, Antonio González Díaz, roblaron esta mañana'l conveniu de creación de la Cátedra R3 PWM d'Inversiones Financieres que naz coles mires de financiar y sofitar el procesu d'acreditación internacional de la Facultá d'Economía y Empresa énte l'Association to Advance Collegiate Schools of Business (AACSB) y d'incentivar la realización d'actividaes formatives y divulgatives, sobre manera nel ámbitu de les inversiones financieres..

Coles mesmes, l'alcuerdu inclúi la collaboración de dambes instituciones na promoción d'actividaes de divulgación y tresferencia de la conocencia y el desenvolvimientu conxuntu de proyectos d'investigación que xeneren beneficiu pa la Facultá d'Economía y Empresa y de R3 PWM; amás de la celebración de conferencies y xornaes científicu-técniques, el diseñu d'acciones formatives, les práctiques remuneraes pal estudiantáu o l'alquisición y caltenimientu d'equipamientu científicu-técnicu y de fondos bibliográficos o documentales.

La Cátedra R3 PWM d'Inversiones Financieres ñaz con una vixencia inicial de cuatro años y una dotación añal de 5.000 euros. R3 PWM Axencia de Valores ye una empresa asturiana de servicios d'inversión especializada n'asesoramientu financieru profesional ya independiente.

Nel actu participó la directora de la Cátedra R3 PWM, Begoña González-Busto Múgica, vicedecana d'estudiantes de la Facultá d'Economía y Empresa y profesora titular del departamentu d'Alministración d'Empreses, y tuvieron presentes la decana de la Facultá d'Economía y Empresa, Carmen Benavides, el profesor asociáu Roberto Fernández-Jardón Rodríguez y miembros del equipu decanal de la Facultá.