La Universidá d'Uviéu llogró 2.872.500 euros pal programa Erasmus 2020, un 20% más en comparanza col añu pasáu. Esta asignación supón un récord nuevu pa la institución asturiana, que, nos postreros cuatro años, llogró triplicar los fondos destinaos a esti programa.

D'esta miente, la Universidá d'Uviéu esguila cuatro puestos y asítiase ente les diez instituciones meyor financiaes d'España, ocupando l'octavu llugar per delantre d'universidaes de mayor tamañu. Acordies col vicerrector d'Estensión Universitaria y Proyección Internacional, Francisco José Borge, "ye de vital importancia, en tiempos convulsos ya inciertos como los que tamos viviendo, caltener l'impulsu internacionalizador que marcó la trayectoria de la nuesa institución nos últimos años. Dende l'añu 2016, llogremos facer medrar el financiamientu del programa Erasmus en prácticamente un 300%, lo que non va dexar namás a un mayor númberu de los nuesos estudiantes tener una esperiencia académica nuna universidá estranxera, sinón que tamién nos dexará aumentar el periodu d'estancia financiáu".