La Universidá d'Uviéu fixo pública la primer llista de persones almitíes en graos con llende de places. Les y los estudiantes almitíos tendrán de formalizar agora la so matrícula del 30 de xunetu al 3 d'agostu hasta les 14 hores. Quien nun formalice la matrícula va dexar la plaza llibre y va correr la llista d'axudicaciones. El periodu de reclamaciones va tar abiertu tamién dende'l 30 de xunetu al 3 d'agostu. El 6 d'agostu espublizaráse la segunda llista d'almitíos y el 27 d'agostu, la tercer axudicación de places.

Primer llista d'axudicación de places

Matrícula n'estudios de grau

Les notes de corte d'esta primer axudicación son provisionales, yá qu'a midida que queden places llibres dirán cubriéndose con estudiantes en llista d'espera. Nesta primer fase, los estudios de grau con nota d'accesu más alta son: Medicina (13,420), Doble Grau en Matemátiques y Física (13,402), Odontoloxía (13,232), Biotecnoloxía (13,200) y Matemátiques (13,100). Penriba del 12 asítiense Física (12,898) y Enfermería (12,887, Uviéu; y 12,554, Cabueñes), Fisioterapia (12,530) y Bioloxía (12,412).

Nesta fase, la Universidá d'Uviéu tramitó un total de 7.379 solicitúes de plaza n'estudios con llende d'almisión de les 11.325 recibíes. El 56,34% de los estudiantes fueron almitíos nel Grau nel que solicitaron plaza en primer opción. El númberu de solicitantes en llista d'espera nos estudios coles notes d'accesu más altes ye: Medicina, con 1711; Doble Grau en Matemátiques y Física, 167; Odontoloxía, 394; Biotecnoloxía, 320 y Matemátiques, 212.