El ‘Leónidas' llogró la segunda plaza y el ‘Great Sailing One', de Fernando Alonso, remató na tercer posición
L'Universidá d'Uviéu-Grupu Isastur', patroniáu por Roberto Bucetas, fíxose cola victoria na última prueba de la Selmana Asturiana de Vela, qu'esta fin de selmana celebró'l so pieslle.
La competición foi unu de los referentes deportivos del Principáu, na que la flota s'adueñó'l sábadu de la mariña asturiana nel so tránsitu dende Candás hasta Lluanco, p'asitiar la so baliza de llegada nel Puertu Deportivu. El domingu, otramiente, ofreció un bon espectáculu, nesta ocasión en dársena xixonesa.
La embarcación estudiantil fíxose a la mar dispuesta a inscribir el so nome na competición que foi l'auténticu platu fuerte de la ventiava primer edición d'esta tradicional regata. Realizaron una bona manga y llevaron la victoria na primer prueba de la fin de selmana. Asitiáronse al mandu de la clasificación xeneral. El ‘Mambo', de José Enrique García, consiguió la segunda plaza y el ‘Leónidas', de José Manuel Quevedo', la tercera.
Entá taba por decidir la victoria, pero l'Universidá d'Uviéu-Grupu Isastur' taba a un pasu del trunfu. El veleru de la institución académica asturiana espachó, de nuevu, una escelente prueba'l domingu na badea de San Llorienzo. Remató segundu, lo que-y dio la victoria na clasificación xeneral de la regata que peslló la Selmana Asturiana de Vela.
El ‘Leónidas' llogró la segunda plaza y el ‘Great Sailing One', de Fernando Alonso, concluyó na tercera posición.
