La Universidá d'Uviéu convocó'l VI Premiu Internacional d'Investigación Lliteraria "Ángel González", al que van poder presentase trabayos en llingua castellana, de calter teóricu o críticu, sobre una tema tocante a la poesía hispánica de los sieglos XX y XXI. L'oxetivu ye incentivar la conocencia, espardimientu, formación ya investigación sobre aspectos rellacionaos cola obra del poeta asturianu, la creación lliteraria y artística y los estudios humanísticos. Ensin qu'ello entre en conflictu colos inescusables criterios calidables, van tomase n'especial considerancia los trabayos que s'empobinen al estudiu de la obra d'Ángel González o de la so xeneración.

El gallardón ta impulsáu pola Cátedra Ángel González de la Universidá, cola collaboración de la Fundación Banco Sabadell. Les o los ganadores van poder ver el so trabayu reconocíu y espublizáu nuna editorial que garantice'l so espardimientu nacional ya internacional. El premiu ta dotáu con 5.000 euros. El plazu de presentación d'orixinales remata'l 15 d'ochobre de 2020.

El xuráu encargáu de fallar el premiu va tar presidíu pol vicerrector d'Estensión Universitaria y Proyección Internacional, Francisco José Borge, o persona en quien delegue, y van actuar como vocales la directora de la Cátedra Ángel González, Araceli Iravedra, y trés miembros designaos pola Universidá ente profesoráu universitariu, crítiques y críticos lliterarios y acreditaos y acreditaes especialistes nes árees y materies oxetu del premiu.

Los llibros presentaos tendrán de ser orixinales ya inéditos, y nun van poder ser premiaos n'otru certame. Escepcionalmente, van poder allegar al premiu aquellos trabayos procedentes de tesis doctorales que, por esixencies de la normativa universitaria, fueren depositaos nos repositorios dixitales de les correspondientes instituciones académiques. Coles mesmes, van poder contener apartaos que seyan reellaboración de trabayos curtios yá espublizaos, siempres qu'estos nun superen un 15% de la totalidá del volume.

La estensión de los trabayos nun va ser inferior a 250 páxines a doble espaciu, con lletra Times New Roman de 12 puntos y márxenes normales de Word, nin superior a 400 páxines de les mesmes característiques. En nengún casu tendrá de figurar nos orixinales el nome del autor o l'autora nin indicación dalguna que lo identifique, sinón un lema acompañáu d'una plica.

El galardón del pasáu añu foi pal estudiu "L'oiseau chante avec les doigts". La música en la poesía española de la vanguardia temprana (1918-1925)", d'Alba Agraz Ortiz, que tomó como base d'esti ensayu la so tesis doctoral, defendida na Universidá de Salamanca. Nella traza un panorama de conxuntu de la poesía española de vanguardia dende'l comparatismu músicu-lliterariu, sorrayando'l papel decisivu de la música na configuración de la nueva estética.