La Universidá d'Uviéu collaboró nel desenvolvimientu d'una plataforma de simulación cuántica pionera n'Europa. Trátase d'una iniciativa de CTIC Centru Tecnolóxicu, denominada QUTE, que dexa completar en pocos minutos simulaciones complexes que tardaríen hores o díes nun ordenador mediu. La importancia d'esta meyora anicia na escosura y nel preciu de los ordenadores cuánticos, que condicionen la investigación en munchos campos que podríen beneficiase de la computación cuántica. 

 

QUTE ufierta a les y los investigadores la posibilidá de crear los sos esperimentos o importar los que yá tengan, pa ser executaos nel simulador. Amás, ye posible consultar l'estáu del esperimentu en tou momentu y, al rematar el trabayu, la mesma plataforma unvia un corréu avisando de que les resultancies yá s'atopen disponibles.

 

La collaboración de la Universidá d'Uviéu llévase a cabu al traviés de personal espertu en computación cuántica. Coles mesmes, na fase de pruebes collaboraron universidaes y organizaciones de toa Europa, coles mires de comprobar la so usabilidá y ameyorar el rendimientu.