María García Fernández y Humberto Fernández Álvarez, personal investigador del grupu de "Teoría de la Señal y Comunicaciones" del Departamentu d'Inxeniería Llétrica de la Universidá d'Uviéu, recibieron dos gallardones a les meyores tesis doctorales na XL Edición de los Premios a les Meyores Tesis Doctorales del Colexu Oficial d'Inxenieros de Telecomunicación (COIT) y de l'Asociación Española d'Inxenieros de Telecomunicación (AEIT). Na presente edición estos premios concediéronse nel marcu del centenariu del Títulu d'Inxenieru de Telecomunicación (1920-2020).

La tesis de María García Fernández, titulada "Nuevos sistemes de midida basaos en sensores electromagnéticos embarcaos en vehículos aéreos non tripulaos p'aplicaciones de ‘Subsurface Imaging' y midida d'antenes", foi gallardonada col Premiu COIT-AEIT a la Meyor Tesis Doctoral en Tecnoloxíes y Aplicaciones de la Inxeniería de Telecomunicación. Los sos directores foron los profesores Fernando Las-Heras Andrés y Yuri Álvarez López.

La tesis trata sobre'l desenvolvimientu de nueves tecnoloxíes emplegando drones pa poder llevar a cabu, per una parte, la detección d'oxetos soterraos (baltes como mines antipersona, restos arqueolóxicos, infraestructura civil) y, per otra parte, la midida y caracterización d'antenes como les emplegaes en redes de telefonía móvil, 5G, radiotelevisión y sistemes radar pa navegación aérea. El trabayu realizáu nesta tesis constitúi la pilastra fundamental del proyectu SAFEDRONE, financiáu pola Universidá d'Uviéu y el Ministeriu de Defensa, nel que se ta madureciendo la tecnoloxía desenvuelta na tesis doctoral cola fin de consiguir una detección más eficiente y segura de mines antipersona y otros oxetos esplosivos soterraos. Los desenvolvimientos tecnolóxicos de dicha tesis tán protexíos por dos patentes internacionales.

La tesis d'Humberto Fernández Álvarez, titulada "Diseñu de metasuperficies p'aplicaciones en sistemes de detección", y empobinada por Elena de Cos Gómez, recibió'l Premiu Hispasat a la Meyor Tesis Doctoral en Sistemes de Comunicaciones Vía Satélite.

La tesis presenta'l diseñu, caracterización y fabricación de metasuperficies p'aplicaciones tales como l'amenorgamientu de la sección recta radar o ameyorar el funcionamientu d'antenes y dispositivos de microondes. Estes aplicaciones son d'interés nel ámbitu de los nuevos sistemes de comunicaciones talos como 5G, redes de sensores (Internet of Things) y sistemes de comunicaciones vía satélite.

L'investigador y la investigadora tán anguaño contrataos con cargu a proyectos del grupu de "Teoría de la Señal y Comunicaciones", nos que siguen ameyorando les tecnoloxíes desenvueltes nes sos respectives tesis doctorales.

El xuráu de la presente edición tuvo formáu por prestixosos profesionales del ámbitu de les telecomunicaciones, incluyendo representantes de les Escueles onde s'imparte la titulación d'Inxenieru de Telecomunicación n'España.