La Universidá d'Uviéu volvió a entamar la so actividá espositiva cola amuesa de fotografíes "La mirada confinada", del artista visual uvieín Rob Loren, qu'axunta una serie d'instantánees realizaes mientres el confinamientu decretáu pol estáu d'alarma énte la crisis sanitaria del coronavirus. Con ella, l'autor quier "rindir homenaxe a les víctimes del Covid-19 y treslladar el pésame a les sos families".

Les fotografíes, en blancu y negru y en formatos diversos, conviértense asina, como esplica'l vicerrector d'Estensión Universitaria y Proyección Internacional, Francisco Borge López, "nuna ventana, nuna imaxe d'esos momentos del confinamientu nos que la vida trescurría detrás de lo visible, tres de les muries", de mou que constitúi un xeitu de rexistru gráficu que dexa constancia d'esos momentos, que nun s'escaezan", añade.

Na inauguración de "La mirada confinada", que pue vese hasta'l 30 d'agostu nel Claustru Altu del Edificiu Históricu, tuvieron tamién presentes la xerenta de la Universidá, Ana Caro Muñoz y la directora del Área d'Estensión Universitaria, María Álvarez Fernández.