Una tesis doctoral de la Universidá d'Uviéu recibió'l Premiu de la Sociedá Española de Mecánica de Roques al meyor trabayo d'investigación en dicha materia. El trabayu de Carmen Cuadonga García Fernández, investigadora del Grupu de Comportamientu Dinámicu del Terrén (DinRock) de la institución académica, nel Departamentu d'Esplotación y Prospección de Mines, tien aplicación para la meyora de les escavaciones soterrañes, voladures y otros procesos industriales de fracturación. La dotación del premiu ye de 3.000 euros y un diploma acreditativu.

 

La tesis, titulada "Mecanismu d'entamu del frayatu en material de comportamientu fráxil so condiciones traccionales", y empobinada pol catedráticu Celestino González Nicieza, foi defendida'l pasáu mes de payares y llogró la calificación de sobresaliente cum laude. La investigación foi publicada en forma de cinco artículos científicos en diverses revistes d'altu impactu, según en comunicaciones en congresos nacionales ya internacionales.

 

Determinar les característiques de la resistencia a tracción en roques resulta de gran importancia para múltiples aplicaciones n'inxeniería geotécnica, tales como escavaciones soterrañes, voladures y otros procesos de fracturación qu'asoceden a nivel industrial, como asocede mientres el llabráu de les cayueles de techar. El trabayu de García Fernández dexa ameyorar la caracterización más habitual, que se realiza al traviés del llamáu ensayu Brasileñu -bien aldericáu na comunidá científica-, al refundiar lluz sobro la manera en que ruempe'l material mientres l'ensayu, qué esfuerzos causen el frayatu y ónde s'empecipia la mesma. Amás, el trabayu inclúi la propuesta d'un novedosu dispositivu pa determinar la resistencia a tracción en material fráxil.