La Universidá d'Uviéu sacó a güei a información pública'l so primer Códigu Éticu, como trámite previu a la so aprobación nel Conseyu de Gobiernu. El borrador, ellaboráu por un grupu d'espertos nel senu del Comité d'Ética de la institución académica, busca complementar el cumplimientu de la llei, introducir meyores y prevenir conflictos. El so oxetivu ye apurrir un conxuntu de compromisos y conductes que pueda sirvir d'orientación para los distintos colectivos de la Universidá d'Uviéu –personal d'alministración y servicios, personal docente ya investigador, y estudiantáu– nel exerciciu de les sos funciones y nel esfrute de los sos derechos. 

 

Coles mesmes, el Códigu Éticu -de calter voluntariu- va empobinar les relaciones de la institución y les del so personal con entidaes y empreses esternes qu'empresten servicios o collaboren cola Universidá, col fin de llograr una universidá más responsable, más xusta y comprometida.

 

No que fai a les previsiones específiques para los equipos de gobiernu y dirección, el documentu establez, ente otres cuestiones, que van actuar en tou momentu de manera respetuosa y ensin incurrir n'arbitrariedá nin abusu de poder, y que van poner especial curiáu en caltener informaes del estáu de la tramitación a aquelles persones qu'unviaren solicitúes, quexes o pidimientos, cola mayor dilixencia posible. 

 

Tocantes a les previsiones pal Personal Docente ya Investigador, el Códigu recueye que les y los docentes van abstener de tresmitir valores dogmáticos contrarios a la cultura democrática, y que'l personal docente ya investigador va caltener en tou momentu xuna actitú respetuosa y de diálogu col estudiantáu y el restu del personal de la universidá. Refúgase, amás, el plaxu, según l'apropiación intelectual del trabayu d'otres persones y l'atribución de l'autoría d'un trabayu nel que nun se participó. 

 

Al respective de les previsiones específiques pal Personal d'Alministración y Servicios, indícase, ente otres coses, que va evitar les situaciones de conflictu d'intereses y va realizar les adaptaciones precises riquíes pol estudiantáu. Pa estos postreros, el testu establez que, si les y los estudiantes detecten casos d'acoso, falta de respetu o discriminación na so redolada tendrán de comunicalo a los sos profesores o profesores, o representantes, por que lo pongan en conocencia de la Unidá d'Igualdá de la Universidá d'Uviéu. Coles mesmes, refiértense, ente otres cuestiones, la realización de plaxu al traviés de l'apropiación d'idees ayenes ensin la correspondiente reconocencia, y la presentación d'un mesmu trabayo fin de grau o trabayo fin de máster en distintes titulaciones.