La Universidá d'Uviéu celebró esti mediudía l'actu conmemorativo de la Festividá de Santu Tomás de Aquino, nel que se fixo entrega de los Premios Estraordinarios de Doctoráu, cursu 2017-18, y de los Premios especiales de la Facultá de Derechu, cursu 2018-19. El rector, Santiago García Granda, felicitó a les y los galardonaos y señaló que "les reconocencies que tan xustamente recibistis non solo son individuales, sinón qu'eponderen a tola comunidá. Sois un estudiantáu preparáu para sirvir a la sociedá al traviés de la enseñanza, les empreses y l'investigación". 

 

Precisamente la investigación ocupó un llugar central nel discursu de García Granda, que fixo referencia a cómo la institución académica punxo en marcha "un Plan de Promoción de la Investigación que llogró movilizar y consolidar un millón d'euros nel nuesu presupuestu, apostando pola incorporación predoctoral y la movilidá d'excelencia, y amontando anguaño'l númberu de contratos predoctorales del nuesu programa propiu". 

 

Coles mesmes, el rector señaló que "esti equipu de gobiernu tien el compromisu de faer frente a les meyores salariales resultantes de l'aplicación del Estatutu del Personal Investigador en Formación, a l'aplicación de les xubíes salariales de les Lleis de Presupuestos nos años 2018 y 2019 al personal contratáu en Proyectos d'Investigación, y a les que se deriven de les evaluaciones positives del Sexeniu de Tresferencia que van beneficiar a un númberu importante del nuesu PDI".

 

Tocantes a les prioridaes de la institución, García Granda indicó que "tienen de pasar por ameyorar los procesos de xestión de la investigación, aprovechando sinergias col gobiernu autonómicu al traviés del programa de torna de talentu y de les misiones, para llograr financiamientu y desenvolver llínees d'investigación específiques empobinaes a la transición ecolóxica, y a encarar el retu demográficu de forma interdisciplinar y dende una perspectiva académica".

 

Sir Salvador Moncada cavilga sobro una dómina en transición

 

La conferencia maxistral tuvo al cargu de Sir Salvador Moncada (FRS, FMedsci, hon FBPHS, Manchester Cancer Research Centre, The University of Manchester), que disertó sobro la tema "Cavilgues pa una dómina en transición". Como esplicó'l conferenciante, Premio Príncipe d'Asturies d'Investigación Científica y Técnica en 1990, "la introducción de nueves tecnoloxíes ye cada vez más rápida y asocede ensin que deamos cuenta. La enerxía solar podría, nun futuru cercanu, convertise na nuesa fonte d'enerxía más importante, moviendo a les que sostuvieron tou la nuesa crecedera económica nos postreros 200 años".

 

A pesar de les meyores tecnolóxiques, l'investigador sorrayó que "el pensamientu críticu de los seres humanos nun puede ser superáu polos ordenadores más sofisticaes remanando billones de datos informáticos y faciendo usu de los algoritmos más modernos". Y esti pensamientu críticu ye'l que tien qu'encetar "les entrugues sobro los peligros a los qu'enfrentamos", ente les que mentó, por casu, "quién va controlar les bases de datos que van ser usaes pa controlar les nueses vides" y "cómo vamos asegurar la tresparencia política y la democracia nun mundu nel que la manipulación subliminal del pensamientu ta volviéndose caltriante".

 

Pa Salvador Moncada, "la emerxencia climática ye, xuntu col peligru d'una guerra nuclear, l'amenaza más grande del momentu pa la humanidá".