Un equipu científicu de la Universidá d'Uviéu acaba de publicar na revista Nature Medicine una investigación que demuestra que les alteraciones de la microbiota intestinal contribúin al avieyamientu aceleráu. Esti estudiu, lideráu polos doctores Carlos López-Otín y Pedro Moral Quirós, cuntó amás cola collaboración del Institutu Nacional de Salú ya Investigación Médica (INSERM) de París, l'Institutu de Productos Lácteos d'Asturies (IPLA-CSIC), la Universidá de Zaragoza y l'Universidá Europea de Madrid.

 

Nesti trabayu, l'equipu d'investigación estudió'l microbioma de mures y pacientes con avieyamientu aceleráu o progeria. El síndrome de progeria de Hutchinson-Gilford, xuna enfermedá rara qu'afecta a una persona de cada cuatro millones, provoca un avieyamientu aceleráu mientres la infancia que conduz finalmente a una muerte prematura de les y los pacientes. El personal investigador demostró que los mures y pacientes con progeria presenten disbiosis intestinal. "Unu de los oxetivos yera identificar qué alteraciones taben presentes na microbiota intestinal de los mures y pacientes con progeria y analizar si les bacteries que los sos niveles taben alteriaos exercíen un papel perxudicial o beneficiosu", señala Carlos López-Otín. "Asina mesmu -prosigue López-Otín-, analizamos tamién la microbiota de centenarios españoles, identificando un aumentu de bacteries beneficioses como Akkermansia muciniphila, que atopábase amás menguada nos mures con progeria". 

 

Pela so parte, Pedro M. Quirós esplica que "la regulación de la microbiota intestinal per mediu de tresplantes o probióticos ye xuna de les llínees d'investigación más prometedores pal tratamientu de ciertes enfermedaes humanes, especialmente aquelles rellacionaes con trestornos metabólicos. Sicasí, la so posible aplicación n'enfermedaes rellacionaes col avieyamientu entá nun s'esquizara". Nesti sentíu, l'equipu d'investigación demostró que'l tresplante de microbiota fecal de mures sanos o'l tratamientu cola bacteria probiótica Akkermansia muciniphila estiende la vida de mures con avieyamientu aceleráu. Como esplica Clea Bárcena, primer firmante del trabayu, "el reemplazu de la microbiota endóxena de los mures con progeria por microbiota proveniente de mures sanos ameyoró diversos parámetros metabólicos amás d'allargar la esperanza de vida; sicasí, los mures sanos que recibieron un tresplante con microbiota proveniente de mures con progeria amosaron alteraciones metabóliques como aumentu de pesu y de los niveles de glucosa en sangre". 

 

Esti trabayu demuestra que la corrección de la disbiosis intestinal por aciu el tresplante de microbiota podría utilizase como futura terapia n'enfermedaes rellacionaes col avieyamientu. Ello ye que como señala José M. P. Freije, "el tresplante de microbiota fecal ye'l métodu más efectivu pa infecciones recurrentes de Clostridium difficile, colo que ye esperable qu'el so usu pueda estendese a otres patoloxíes".

 

L'estudiu foi financiáu pol proyectu DeAge del European Research Council, la Progeria Research Foundation, l'Institutu de Salú Carlos III, el Ministeriu de Ciencia, Innovación y Universidaes y la Fundación Bancaria Caxa d'Aforros d'Asturies. Per parte de la Universidá d'Uviéu y l'Institutu Universitariu d'Oncoloxía del Principáu d'Asturies (IUOPA) participaron nel estudiu Clea Bárcena, Rafael Valdés-Mas, Pablo Mayoral, Cecilia Garabaya, Francisco Rodríguez, María-Teresa Fernández-García, José M. P. Freije, Pedro M. Quirós y Carlos López-Otín. Tamién roblen el trabayu Sylvère Durand, Noélie Bossut, Fanny Aprahamian y Guido Kroemer del INSERM de Paris; Nuria Salazar y Alicja M. Nogacka, del IPLA-CSIC; Nuria Garatachea, de la Universidá de Zaragoza; y Alejandro Lucía, de la Universidá Europea de Madrid.